de Màuru Piredda
 |
| Deretos Matthew Staver/Bloomberg via Getty. Url imàgine |
A pustis de su "super martis" de su 16 de martzu (cun sa conchista de sa Flòrida, de s'Illinois, de su Missouri, de sa Carolina de su Nord e de s'Ohio) pariat chi pro Hillary Clinton ddoe esserent feti caminos in falada. Ma in is primàrias de su 22, su Segretàriu de istadu at pigadu una prima surra binchende petzi in Arizona (cun pagu prus de su 57% de is cunsensos). Bernie Sanders, difatis, at triunfadu in s'Idaho (78%) e in su Utah (79,3%). Surra galu prus manna in is eletziones de su 26: 3-0 pro Sanders vitoriosu in Alaska (81,6%), Hawaii (69,8%) e Washington (72,7%). «Annanghe su Wisconsin a sa lista!», fiat su motu de su sotzialista de su Vermont in is dies coladas. E gasi est istadu: 56,5% de is cunsensos e 45 delegados.
«Is mèdios corporativos sighint a nàrrere chi nche semus in foras, ma semus sighende a bìnchere in is istados e cun grandu vantàgiu. Si sighimus gosi amus a ispantare totu cantos e a conchistare sa nòmina». Sunt 15 is primàrias bìnchidas dae su senadore de manca fina a imoe. Tres in mancu de Clinton. Su divàriu de is delegados s'est isminorighende: 1743 pro s'ex first lady, 1056 pro Bernie. Si nche diamus dèvere bogare dae su contu is super-delegados (469 pro Clinton e 31 pro Sanders) nche colamus dae unu vantàgiu de 687 a unu de 249. Sunt 212 is grandu eletores chi galu non si sunt espressados, ma no est in cue chi at a piscare su candidadu de manca (nointamen sa possibilidade chi ddu votet Bill Clinton): issu punnat a is giòvanos americanos chi parent torrende a s'acurtziare a sa polìtica.
Sanders podet bìnchere finamentas in su Wyoming, custu sàbadu. Ma, pro unos cantos analistas, ant a èssere is primàrias de s'istadu de New York a nàrrere si sa cursa est galu aberta: in cue ddoe at 291 delegados in pàliu, in su Wyoming petzi 18.
