 |
| Deretos Coldiretti |
Una carovana de tratores cun sas banderas de Coldiretti est mòvida custu mangianu dae sa zona industriale nugoresa de Pradu conca a Otzana. Chistiones de sa protesta: su preju de su late e sos prèmios comunitàrios. «Cherimus rispostas dae sa Regione» at naradu su presidente regionale Batista Cualbu. «Sa Sardigna - at annantu - est s'ùrtima regione pro s'acumprimentu de sas pràticas de sos prèmios. Pro su 2015 nche semus galu a su 34%». Pro su chi pertocat su preju de su late paret chi siat pronta una «difida a sos industriales dae banda de sos avocados nostros». Pro Cualbu «sa lege narat chi su preju de su late non si podet modificare (nen minimare, ne artziare) sena lu cuntratare cun nois». E a pustis sa minetza: «Si no amus a otènnere rispostas amus a manifestare in cada provìntzia».
Est dae su mese de trìulas de su 2015, cando su preju de su Pecorino romano nche fiat cròmpidu a 9,38 èuros su chilu, chi si comintzeit a faeddare de su late a 90 tzentèsimos su litru. In cussas dies in Bànari, in s'addòbiu programmadu in intro de sa "Fiera agroalimentare", s'industriale tiesinu Giommaria Pinna prospeteit una grandu calada de su preju de su casu, e duncas de su late. Ma pro Coldiretti non b'at paragone ca su Pecorino nch'est caladu petzi a 7,85 èuros su chilu. Cunfrontende sos datos de ocannu cun sos de su 2012, su preju-late est crèschidu de su 14% (dae 70 a 80 tzentèsimos); su de su casu mentovadu de su 51% (dae 5,18 a 7,85). Sighende sa matessi trata su preju de su late nche diat dèvere èssere a 1,05 èuros su litru.
