 |
| Deretos Ansa URL imàgine |
A èssere animosos no est unu delitu. Lu fìamus nois e lu fiat issu. Su disafiu de Amstel (Olanda), su prus lèbiu, diat èssere dèvidu èssere su batijare suo in sas tres clàssicas de su Nord. Isetende sa Fritza de Vallònia de mèrcuris 20 e sa Liegi-Bastogna-Liegi de domìniga 24, comente aìamus annuntziadu sa chida colada. Imbetzes b'at àpidu un'impìrigu. Sos efetos de sa rutòrgia chi l'aiat custrintu a su ritiru in sa de chimbe tapas de su Giru de sos Paisos Bascos, a printzìpios de su mese sunt torrados a pìgiu. Sa die fiat una die proinosa e suta sa temporada, in su de 89 chilòmetros, lassineit e iscudeit su bratzu mancosu, su burtzu e mescamente s'ischina cun fortza contra a s'asfaltu ruende·nche a intro de sa cuneta. No aiat tentu peruna fratura, peruna ferta grae e pariat chi totu esseret in dima e chi esseret in possa pro afrontare sas Ardennas.
Ma in Olanda, domìniga colada, s'ischina no at règhidu. Est mòvidu cun sas mègius uras, ma a pustis de unos cantos chilòmetros, sas dòlgias sunt torradas turmentende·lu e impedumende·li su restu de sa gara. Intervistadu dae sa televisione olandesa, Fàbiu at decraradu chi at a renuntziare fintzas a sas àteras duas clàssicas nòrdicas prevìdidas pro su 20 e pro su 24, semper de abrile. E chi como s'at a sestare tempus e allenamentu pro arguire su Giru de Frantza. Pro non bi nche cròmpere cun sos fastìgios a s'ischina e pro non cumpromìtere un'istajone intrea chi, a dolu mannu pro issu, no est cumintzada in sa mègius manera. Semper e cando su caràtere suo, nointames sa mùtria de su momentu, li permitit de nche barigare cale si siat anneu. Cun s'isperu chi fintzas sa carena sigat sa matessi trata de s'ìndula sua, l'isetamus in Frantza, in su mese de trìulas, pro sa de 103 editziones de sa Grande Boucle (dae su 2 a su 24). E in su mese de austu, in Rio de Janeiro, pro sas Olimpìades. A tempus prus!
