de Màuru Piredda
In intro de s'istrategia de s'Agenda
digitale, sa Regione nch'at insertadu finamentas su progetu "Retes pro
sa seguridade de is tzitadinos e de su territòriu": 7 milliones e
150mìgia èuros pro pònnere in òpera unu sistema de vìdeo-bardiamentu
articuladu e isparghinadu in 80 Comunas (32 cun populatzione inferiore a
2mìgia abitantes, 25 intre is 2mìgia e is 5mìgia, 23 cun prus de
5mìgia). Su progetu at a interessare (cun gastu de 6 milliones e
900mìgia èuros) finamentas tres Uniones comunales (Anglona, Gaddura arta
e Terrabesu), sa Comunidade montana de su Nugoresu e s'agregatzione
Orgosolo-Orthullè. DDoe ant a bòlere àteros 250mìgia èuros pro su nodu
de gestione infra-istruturale de su sistema regionale. S'obietivu de sa
Giunta est su de menguare is fenòmenos de illegalidade. Ma carchi
pregonta bolet posta.
Cantas ant a èssere is telecàmeras (cunforma a is tres fàscias) pro cada bidda? Cales ant a èssere is tretos compidados? Cale tipologia de reatu si bolet cuntrastare? Ddoe at un'istùdiu a palas e una rechesta dae is Comunas? Paret chi nono. Is Entes locales ant feti pigadu parte a una manifestatzione de interessu chi iscadiat su 12 de santandria de su 2013 (cando galu bi fiat Cappellacci). Tando, cunforma a su Por Fesr 2007-2013, s'istantziamentu fiat de 4 milliones e 500mìgia èuros. Ma imoe «sa Giunta ghiada dae Frantziscu Pigliaru - at acraridu s'assessore de is Afares generales Giuanne Màriu Demuro - nch'at insertadu su progetu a intro de s'Agenda digitale cun un'istantziamentu prus mannu de resursas, acreschende su nùmeru de Comunas benefitziàrias». Como, duncas, nche sunt in intro totu is tzentros abitados chi, mancari idòneos, non aiant pigadu in cunsideru a cajone de is resursas limitadas.
Àtera pregonta: ant a èssere is telecàmeras a
cuntrastare sa povertade e is problemas sotziales chi agatamus in is
biddas de Sardigna?
