 |
| Deretos sardegnadigitallibrary, Url imàgine |
Chimbe chervos sardo-corsicanos ant torradu a populare su situ Natura 2000 de su Massif du rotondu, in sa comuna de San Petru di Venacu, in Còrsica. Faghent parte de su progetu duos mascros, duas fèminas e unu bitu. Su chervu, in s'ìsula “nustrale”, at àpidu problemas mannos in su sèculu coladu. Sa fase prus crìtica l'at tenta in su 1969, annu chi est isparèssidu de su totu fintzas a cajone de sa cassa illegale.
Como, su programma de repopulamentu est andende a dae in antis gràtzias a sos interventos de s'Ispra, de su Parc Naturel Régional de Corse, de s'Ente Forestas de sa Sardigna, de sa Provìntzia de su Campidanu de mesu, de s'Onf e de sos pilotas de sa Star Work Sky. S'ùrtimu trasportu l'ant operadu su 15 de custu mese. A sas tres de mangianu, nch'ant tramudadu sos animales dae sa Costa birde a s'Alighera. Dae inoghe est mòvidu su biàgiu in elicòteru conca a Còrsica.
A bator chervos lis ant postu fintzas unu ràdio-collare, in manera de pòdere monitorare sos ispostamentos e s'adatamentu a su territòriu nou.
Sa testimonia de s'operatzione in custu vìdeu:
