de Màuru Piredda
Nointamen is ausèntzias, feti unu est s'obietivu de su Casteddu: bìnchere pro nche barigare su Crotone. Is ruju-biaitos dd'ischint chi no at a èssere una passigiada. S'allenadore de su Perugia, Pierpaolo Bisoli, nche torrat a su Sant'Elia a pustis de ddoe àere giogadu e a pustis de àere ghiadu s'iscuadra sarda. E no at a cuntzèdere nudda a is ex cumpàngios suos. Ca gasi est su fùbalu.
Is
casteddajos si faghent bìdere dae su primu minutu cun Farias, ma Rosati
est puntuale a ddi firmare is intragnas. Nche colant 6 minutos e su
Casteddu ddoe torrat a proare cun Balzano: Belmonte est custrintu a
nche ghetare sa botza a foras. A pustis de un'interrutzione de giogu
(Joao Pedro segat sa rete de sa porta perugina) e de unu tiru perigulosu
de su tzentrucampista brasilianu (chi sa rete dda cheret segare feti in
manera metafòrica), Cinelli, a su de 11 minutos, nch'iscàrrigat sa
botza a intro ma nât chi s'interventu est fallosu. Gol annulladu e
casteddajos inchietos. Is atziones de ambas iscuadras s'intrèverant pro
una bintina de minutos. A su de 33 minutos Prcic, dae is 20 metros,
nch'iscudet unu tiru chi non dat peruna ispera a Storari. 0-1. Su
Casteddu reagit deretu e ddoe proat cun Sau (dae is 10 metros) e cun
Salamon (de conca), ma Rosati narat chi nono. Is ruju-biaitos non nde
bolent s'intesa e Farias, firmadu in àrea, pedit su rigore. Retzint feti
una targhita groga: Krajnc ammonidu. Àteras pagas atziones dae ambas
partes e Sacchi nch'imbiat is iscuadras a si pasare pro unu cuartu de ora.
Acabbadu
su pasu, torrant a su campu cun is matessi formatziones. Is casteddajos perdent sa botza a su segundu minutu,
Zapata nd'aprofitat e aprontat unu contratacu ma su tiru suo non ponet
oriolos a sa defensa ruju-biaita. Nche colant pagos minutos e Zapata
benit ammonidu. A su de 10 minutos est Aguirre a retzire sa targhita
groga. Su tempus colat e is nostros non si podent permìtere de pèrdere su disafiu.
Ddoe proant Farias (chi serbit unos cantos passàgios traessos), Balzano,
Cerri e Cinelli, ma nudda. Sau, in antis de si nch'essire
tzopis-tzopis, serbit sa botza a Joao Pedro chi procurat a su Casteddu
unu tiru dae su cugione, ma Tello nche dd'iscudet a foras. Tello, Joao
Pedro e Salomon ddoe torrant a proare ma a su '93 Milos marcat su 0-2
definitivu.
Formatziones
Casteddu: Storari,
Balzano, Salamon, Krajnc, Barreca (61' Murru), Cinelli, Fossati, Joao
Pedro, Farias, Cerri (75' Tello), Sau (84' Melchiorri).
Allenadore: Massimo Rastelli
Perugia:
Rosati, Mancini, Belmonte, Volta, Rossi, Milos, Rizzo, Prcic, Guberti
(71' Della Rocca), Zapata (64' Alhassan), Aguirre (85' Fabinho).
Allenadore: Pierpaolo Bisoli
Gol: 33' Prcic, 93' Milos
