 |
| Deretos Getty images DeMorgen |
Sos mortos sunt 34 e sos fertos 230, ma in aterue sunt firmos a 25 e a 178. S'assàchiu l'at rivendicadu Daesh, ma no est ufitziale. Unas cantas velinas crompent dae Tass, s'agentzia russa, ma àteras in contradditòriu dae Londra o dae Parigi. «Est una vindita de Daesh. Sa cajone de su degòlliu in Bruxelles, est sa risposta de sa jihad a s'arrestu de Salah Abdeslam» si leghet in unas cantas pàginas nostranas: Sole 24 ore. Ma nemos tenet galu una versione definitiva.
S'imprenta internatzionale est afusada. Medas sas noas, medas sos tìtulos e meda sa cunfusione. Sos giornales belgas si contraighent unu cun s'àteru. In contu de vìtimas, de nùmeros, de mezos impreados pro s'assàchiu. Isetende rivendicatziones chi non crompent o crompent a s'isfaddida. A un'ala emitende cundennas e a s'àtera galu pregontende pro ite, chie e comente. No est fàtzile. Sunt momentos tortos e tortu est s'assentu cunforma a s'informatzione. Unu time-time generale pro sa cherta de sa veridade. Ite publicare? Cando? E mescamente, totu ischimus? E su chi ischimus ite est? Veridade, ipòtesi, imbentu, cumplotu?
Gasi sas autoridades: retòrica, minetzas imbeladas de revesa, promissas a sos tzitadinos chi luego diat cròmpere sa giustìtzia. Che a semper. Pagu s'anàlisi. Pagu s'ispessore de sos interventos istitutzionales. Peruna ipòtesi de curpa o de errores internos. Semus in otzidente, in domo nostra e nemos podet intrare a nos istorbare, a nos fèrrere. Paret chi petzi nois lu potzamus fàghere in aterue. Sa timòria est in totue, in pare cun su corrutu, sa disorientadura e su dolore innotzentes. Su primu ministru belga at chistionadu de pranos, de atziones pro su venidore, de controllos serrados, de cundenna. Ma non at naradu cando, comente, in ue, contra a chie e cun cales mezos. Mogherini dae Giordània, fiat a làgrimas, declamende tristura, disaura e orrore «pro s'Europa e pro sa capitale sua».
Ismentighende forsis chi sas vìtimas, sos innotzentes, de totue fiant e sunt, francu chi non de un'Europa chi no esistit. Non sa chi fiat lastimende issa. Tzaculitas reales e metafòricas pro unu ministru chi no ischit a ue si dare, ite nàrrere, ite fàghere. Merkel a sa muda. Renzi cun su tuitadore guastu. Hollande in fèrias. Sos servìtzios segretos a pàmpalas. Sos majores de su mundu isetende o programende, suta trata, sos interros imbenientes. Unu degòlliu in intro a su degòlliu.
