 |
| Deretos Msf. Url imàgine |
Sunt a su nessi 50 is mortos a pustis
de is bombardamentos de eris contra a ospidales e iscolas in su nord de
sa Sìria. Dd'at annuntziadu su segretàriu generale de is Natziones
unidas Ban Ki-moon, orioladu pro s'àndala mala chi est pighende su
cunflitu. Intre is istruturas corfadas finamentas un'ospidale de is
Mèigos sena fronteras (Msf): bator is coetes retzidos in duos atacos,
unu in fatu de s'àteru. A su chi narat Massimiliano Rebaudengo, cabu
missione de Msf, «sa derruta de custu ospidale privat de is curas 40mìgia pessones chi bivent in custa zona de gherra».
In su presìdiu Msf, chi contaiat 30 letos, duas salas operatòrias,
un'ambulatòriu e una sala de emergèntzia mèiga, ddoe traballaiant 54
pessones. 1500 is patzientes cada mese. Ma de chie est sa neghe? Dae
cale àeroplanu sunt mòvidos is coetes? Eris non ddoe aiat peruna duda:
is russos. Is giornales de oe abarrant agigu prus arrechetados.
No
est sa prima bia chi is aviatziones corfent sena dolu istruturas che a
custas. Ma no est nemmancu sa prima bia chi s'informatzione àbdicat a su
ruolu suo isparghinende informatziones chi non nche crompent a sa
beridade cumpleta e funduda. Nch'at coladu pagas dies dae cando unas
cantas bombas nche sunt rutas in un'ospidale serente a sa tzitade de
Alepu. Finas tando nât chi fiant is russos. Finas a cando is russos
etotu no ant naradu chi, in cussos momentos, «duos A-10 americanos - gasi su ministru de sa Defensa Igor Konshenkov - nche sunt intrados in su tretu aèreu sirianu dae sa Turchia, bolende subra de Alepu e bombardende obietivos».
A pustis de custas decraratziones su mudìmene de s'imprenta atlantista.
Chi aerent resone is russos? Imoe su segundu tempus, movende dae is
decraratziones de su guvernu turcu e de s'Osservatòriu sirianu pro is
deretos umanos. Cun sa Rùssia chi torrat a nàrrere chi no at bombardadu
perunu ospidale.
Ddoe ant a àere isvilupos de custa noa? At a sighire un'àteru mudìmene? S'ùnica seguresa chi tenimus est chi custos acadessimentos sunt petzi unu paragrafeddu de su libru chi is istados interessados sunt iscriende in Sìria. Cun su càlamu insambenadu.
Ddoe ant a àere isvilupos de custa noa? At a sighire un'àteru mudìmene? S'ùnica seguresa chi tenimus est chi custos acadessimentos sunt petzi unu paragrafeddu de su libru chi is istados interessados sunt iscriende in Sìria. Cun su càlamu insambenadu.
