 |
| Deretos odontonetwork.com, Url imàgine |
Sos detàllios de s'esame los at presentados David Wong in unu cunvegnu de s'Assòtziu americanu pro s'avantzamentu de sas sièntzias (Aaas). Su chircadore de s'Universidade californiana de Los Àngeles at naradu chi: «Si su tumore est a rodeu in su sàmbene o in sa salia de una pessone, custa proa permitit de l'agatare. B'at bisòngiu petzi de unu gùtiu de salia e sos resurtados ant a èssere a disponimentu in pagu prus o mancu deghe minutos».
Custa diàgnosi primidia diat pòdere rivolutzionare sas proas de rilevamentu tumorale atuales, a como prus invasivas e costosas. Sa biopsia lìcuida, imbetzes, permitit de rilevare sas àstulas de su Dna tumorale in deghe minutos e cun unu costu inferiore a 20 èuros. S'esame est afidàbile a su 100% e si podet fàghere in logu de ambulatòriu, in sa potecaria o fintzas in domo.
Pro como est dimustradu chi funtzionat bene meda pro su rilevamentu de su tumore a purmones. S'agentzia americana chi règulat s'impreu de sos fàrmacos at a dare su pàrrere positivu in intro de duos annos. Duncas no est esclusu chi diat pòdere intrare in cummèrtziu in su Rennu unidu dae inoghe a bator annos.
Custu sistema diagnòsticu podet èssere sa crae pro identificare deretu sos tumores comente su de su pàncreas chi, a oe, non tenet mètodos de controllu eficatzes. «In sos annos imbenientes – at naradu Wong – at a èssere possìbile a tènnere fintzas una proa in gradu de rilevare, in su matessi momentu, genias diferentes de tumore».
