Su disafiu cun su Cesena nche cheret ismentigadu deretu e sa de oe est s'ocasione mègius pro lu fàghere. Paràula crae: prodùere giogu. Siat pro cunfirmare chi su primu postu in classìfica si lu meressent sos sardos e siat pro ammustrare chi, cun un'iscuadra in emergèntzia (medas sunt sos iscualificados e sos infortunados) sas alternativas a disponimentu de Rastelli sunt de livellu artu.
Su Novara però est malu a domare, l'at cunfirmadu in sa partida de s'andada. Oe puru sos òmines de Baroni si dant ite fàghere, assachiende deretu sa porta defensada dae Storari. Su Casteddu imbetzes paret su matessi de chenàbura colada, pagu pretzisu in sos passàgios. Bi proant a fraigare carchi cosa sos casteddajos, ma su giogu no est netu e sos giogadores non resessent a dare anneu a sa defensa aversària. A su de 30 minutos, pro non bastare, sos ruju-biaitos abarrant in deghe. Fossati devet lassare su terrinu de giogu pro unu fallu a Lanzafame. Fiat giai ammonidu. S'àrbitru Ghersini, sena làstima peruna, l'ammustrat sa de duas targhitas groga in antis de sa ruja e nche lu bogat. A pustis de ses minutos arribat fintzas su vantàgiu de sos istràngios. Dae sa defensa arribat una bella botza pro Gonzales chi, cara a Storari, si firmat sa botza e lassat mòvere unu tiru a su cugione. Storari non bi cròmpet. 0-1. Como s'istrategia colat dae sas ideas de Rastelli, pro chircare a su nessi de nche la paregiare. In sos ùrtimos minutos de sa prima fase sos piemontesos nche diant pòdere marcare fintzas su de duos, ma Storari essit conca a sa botza e sarvat sa porta. Su primu tempus si nche tancat gasi. S'impressione est chi s'iscuadra sarda siat sighende sa matessi àndala chi at praticadu contra a su Pescara e a su Cesena.
Su segundu tempus cumintzat cun Colombatto in càmbiu de Melchiorri. Su Casteddu como est prus cobertu e fintzas in dae in antis s'atacu si nch'acherat de prus a s'àrea de Da Costa. Sos biancu-asulos como paret prus passivos, isetant sas mossas de su Casteddu, chi nd'aprofitat e pressat bene. A su de 73 minutos su Novara movet unu contratacu in bator contra a unu, ma sos piemontesos nch'imbolant s'ocasione. Su tiru de Faraoni nch'essit a foras. Sos binti minutos chi bi mancant a s'acabbu nche colant sena peruna atzione de importu. In prus, sos càmbios e sos fallos partzint su giogu sena li dare continuidade e faghende pèrdere su ritmu a sos giogadores. S'àrbitru frùschiat tres bortas, su resurtadu est de 0-1.
Cando b'at crisi tocat de l'ammìtere e tocat de agatare sa cajone chi l'at ingendrada. Sos giogadores parent istracos giai in antis de cumintzare e su giogu no est ordinadu. Forsis su problema est psicològicu, ma custu tocat a Rastelli a l'averguare. Semper e cando abarrat sa prima derrota de s'istajone cara a sos tifosos. In su Sant'Elia su Casteddu non bi perdiat dae su 17 de Maju de su 2015. Fiat contra a sos sitzilianos de su Palermo e fiat sa matessi die de s'ufitzialidade de sa torrada a Serie B de sos sardos.
Formatziones
Casteddu: Storari, Barreca, Krajnc, Salamon, Balzano, Joao Pedro, Fossati, Deiola, Farias (65' Cerri), Melchiorri (46' Colombatto), Sau (75' Giannetti).
Allenadore: Massimo Rastelli
Novara: Da Costa, Faraoni, Troest, Dell'Orco, Garofalo, Viola (86' Buzzegoli), Casarini, Farago, Lanzafame (79' Evacuo), Gonzales (86' Dickmann), Corazza.
Allenadore: Marco Baroni
Gol: 36' Gonzales
Espulsos: 30' Balzano
