 |
| Deretos Reuters, Url imàgine |
Sos sucurridores sunt intervènnidos deretu boghende·nche 87 minadores dae sa trampa in fundu de terra. S'irrainamentu est acontèssidu in una mina de Barbeton, in sa provìntzia de Mpumalanga, a pagu tretu dae sa làcana cun su Swàziland, in s'Àfrica de giosso. Logu nòdidu pro sa presèntzia de minas de oro.
Sa sotziedade at naradu chi non b'at perunu mortu, ma chi b'at ancora tres pessones ispèrdidas. In sa mina, a su chi narant semper sos responsàbiles de sa Vantage Goldfields, bi fiant traballende pagu prus o mancu unas 115 pessones, ma nemmancu custu nùmeru est ufitziale.
Sas de s'Àfrica de giosso sunt sas minas prus perigulosas de su mundu, male famadas giai in sos tempos de s'apartheid. Su raportu de su dipartimentu locale de sas resursas mineràrias narat chi s'annu coladu (2015), sas pessones chi sunt mortas in sas disauras mineràrias fiant petzi 77, s'8% de mancu cunforma a su 2014. In sos annos a curtzu a su 1994, imbetzes sa mèdia de mortos fiat pagu prus o mancu de 800 unidades s'annu.
