de Màuru Piredda
A su chi narant is sòtzios pro is deretos
de is omosessuales, eris, manifestende in is pratzas italianas, ddoe
aiat prus de unu millione de tzitadinos. Tàtari, Nùgoro e Casteddu is
pratzas sardas. Sa mobilitatzione, acumpangiada in is retes sotziales
dae s'eticheta #SvegliaItalia, est nàschida pro «pro dare fortza a sa
punna de s'agualidade». Est a nàrrere, pro sustènnere s'aprovatzione de
su disinnu de lege "Cirinnà" in contu de uniones tziviles intre pessones
de su matessi sessu. Mancari in su partidu suo ddoe apat chie est
contra a custa punna (s'ex ministru Fioroni at a pigare parte a su
"Family day"), Matteo Renzi at naradu chi «semus abarrados s'ùnicu paisu intre is 28 de s'Unione europea a no àere una disciplina pro custas uniones», agiunghende chi «totus is positzione sunt giustas».
Su
28, duncas, su disinnu Cirinnà at a èssere dibàtidu in su Senadu. Prus
de 6mìgia is emendamentos: 5228 is de sa Lega e una sessantina is
propostos dae unos cantos senadores de su Pd. Pro fàghere sìntesi intre
is ànimas de su partidu de su primu ministru, su presidente de sa
commissione Giustìtzia, Giuseppe Lumia, at presentadu unas dòighi
propostas pro su chi pertocat sa partzidura intre is duos istitutos (su
matrimòniu e s'unione tzivile) e s'"adotzione de su figiastru". Pro is
defensores de sa "famìlia traditzionale" sa mesura chi a s'ispissu
intendimus mentovada comente "stepchild adoption", nche crompet a is
adotziones omosessuales. Pro is sustenidores de custa possibilidade, si
garantit sa podestade genitoriale a su fìgiu biològicu de su cumpàngiu o
de sa cumpàngia, s'in casu custu (o custa) si nche mòrgiat.
«Unu pipiu tenet bisòngiu de unu babbu e de una mama»,
narant is "sentineddas ritzas" e is chi ant a manifestare su 30 de
ghennàrgiu. «Unu pipiu tenet bisòngiu de amore, is deretos sunt pro
totus, is pitzocos omosessuales creschent in is famìlias
traditzionales», rispondent is partisanos de is uniones tziviles.
