 |
| Deretos LaPresse, Url imàgine |
Su tzentru caente de su terrore paret chi si nche siat frantu conca a sa Turchia. Oramai, in su paisu de sa mesu luna, sas fainas graes sunt belle fitianas. Custu mangianu, pagu prus o mancu a sas 10:20 (sas 9:20 in Sardigna), unu kamikaze saudita s'est fatu esplòdere in su tzentru de Istanbul, in sa pratza de Sultanahmet. Su logu est semper prenu de turistas, bidu chi a curtzu b'at unos cantos monumentos comente a sa Moschea biaita, a sa ex basìlica de Aya Sofia e a su palatzu Topkapi.
Sas vìtimas a dolu mannu non bi mancant nemmancu custa borta. Sos mortos sunt 11 e sos fertos 15. Una fonte de s'ufìtziu de Ahmet Davutoglu at riferidu a sos òrganos de imprenta chi noe de sas ùndighi vìtimas sunt tedescas, sas àteras duas sunt coreanas. Intre sos fertos, imbetzes, b'at ses tedescos, unu norvegesu e unu peruvianu. Duos sunt graes.
Su primu ministru turcu at cunvocadu un'assemblea de emergèntzia cun su ministru de s'internu Efkan Ala e su cabu de sos servìtzios investigativos Hakan Fidan.
Daesh at rivendicadu deretu s'atentadu.
