 |
| Deretos lìberos, Url imàgine |
Sas temperaduras abarrant prus artas de
sa mèdia de su perìodu. In die de gianteris, in Casteddu, su
termòmetru nch'at barigadu sos 21 grados, marchende sa die comente
una de sas mègius beraniles. S'ierru ancora no at detzisu de si
fàghere logu, mancari in sas dies coladas b'apat àpidu abba e
bentu. A su nessi sa sicagna no est prus unu problema comente in su
mese coladu. Sos lagos podent torrare agigu de alenu in pare cun sa
terra.
Su caentu s'intendet mescamente in sos
giassos de mare e in sos paris de su campidanu. In sas dies
imbenientes però carchi cosa at a mudare. Carchi
cosa chi s'assimìgiat a su fritu l'amus a pòdere intèndere dae su
12 de ghennàrgiu, narant dae s'ufìtziu de su tempus de Decimomannu,
agiunghende chi martis sas temperaduras ant a minimare de bator o
chimbe grados e b'at a arribare una temporada.
In s'ìnteri, oe, si nch'est giai
pesadu su bentu bosincu chi at a iscutinare sos pilos mescamente de
sos aristanesos, de sos aligheresos e de sos tataresos.
