 |
| Deretos lìberos, Url imàgine |
S'esecutivu regionale at aproadu s'istitutzione de su registru regionale de sos tumores. Un'aina chi sos sardos pretendiant dae tempus meda. In custos annos est fintzas nàschidu su comitadu Sa Luxi, chi at postu a pare pessones e assòtzios pro marcare sa netzessidade de àere unu registru de sos tumores in totu sa Sardigna. At a èssere unu documentu chi at a iscumproare s'intzidèntzia reale de sas patologias tumorales in su territòriu sardu.
In base a sos datos de sos duos registros territoriales de Tàtari e Nùgoro, sos tumores prus difusos sunt sos chi pertocant su sinu, sa pròstata, su purmone e sas istentinas. In su tzentru-nord de s'ìsula sa rilevàntzia est de 400-450 casos cada 100mìgia abitantes, cun carchi nùmeru de mancu in sos tretos de sas Asl de Nùgoro, de Aristanis e de s'Ogiastra.
Pro ativare custa faina de importu mannu, sa regione at giai impinnadu 42 milliones de èuros in tres annos pro su pranu de preventzione. In pràtica, a sos duos registros chi esistint giai, si nch'agiunghet su de tres, chi at a pertocare sa Sardigna meridionale. Como tocat de isetare su pàrrere de su garante de sa riservadesa e de su Consìgiu regionale.
