 |
| Sa deputada "no Mas" Anna Gabriel. Deretos Ivan Giménez. Url imàgine |
Sa Cup deviat seberare si nàrrere chi
nono o chi emmo a s'imbestidura de Artur Mas comente presidente de sa
Generalitat catalana e, duncas, a is mesuras polìticas cuntènnidas in
intro de sa proposta de acordu presentada in is dies coladas. Ddoe aiat
bator optziones in sa mesa: guvernu de coalitzione intre Cup e Junts pel
sí ghiadu dae Mas; perunu sustennu a Mas e eletziones noas in martzu
sena un'alternativa dae banda de Cdc e Erc; sustennu esternu a su
guvernu Mas; astensione pro s'imbestidura lassende a Junts pel sí
s'ònere de si chircare su sustennu in àula. A pustis de tres
votatziones, cosa de non crèere, ddoe at àpidu una paridade perfeta
(1515 votos) intre sa prima e sa segunda optzione. Duncas si nd'at a
torrare a chistionare su 2 de ghennàrgiu. Sa die, su Consìgiu polìticu e
su grupu parlamentare ant a pigare unu disinnu definitivu.
Dae
s'incràs de is eletziones autonòmicas, sa Cup at retzidu pressiones meda
pro chi sustenneret a Mas. Una intre is pressiones prus esplìtzitas sa
de Lluís Llach, su cantautore nòdidu de "L'estaca" chi imoe est deputadu
in Bartzellona: «Sa base de sa Cup depet disinnare: indipendèntzia o nono».
Ma at retzidu finamentas ingiùrgias comente irresponsàbiles, traitores,
setàrios, cuintocolunnistas e serentes a s'imprenta neofalangista,
abarrende intre is prus lèbias. «Ponide·bos in sa situatzione nostra - at naradu Arnau Aymerich, consigeri comunale de Argentona - si naramus chi eja a Mas amus a èssere traitores de sa classe operaja; si ddi naramus chi nono semus traitores de sa pàtria».
Su
mesu de s'assemblea de sa Cup at duncas traitu sa pàtria? S'àteru mesu
at traitu sa classe operaja? Su chi si podet nàrrere est chi sa Cup est
partzida. Isabel Vallet, ex deputada, aiat naradu in su parlamentu
catalanu chi a chistionare in antis de indipendèntzia e petzi a pustis
de cumbata de classe diat èssere istada una trampa. Ma su 50% de sa Cup
at disinnadu de antepònnere sa chistione de s'indipendèntzia in antis de
totu narende chi emmo a Mas e a una proposta econòmica mìnima cunforma a
su programma suo. Su grupu parlamentare at fàghere su matessi? 5 a
favore e 5 contra a Mas? Su blocu indipendentista nche diat cròmpere a
67 sègios subra de 135 e a Mas non ddi diant bastare su matessi. Is
parlamentares s'ant a astènnere? Un'assemblea noa?
Su chi contat
est chi sa fortza chi est crèschida de prus dae is eletziones de su 2012
como est partzida in duos. Su #PressingCup (sa campànnia polìtica e
mediàtica aprontada pro nche pinnigare su movimentu de manca) est
renèssidu. A metade, ma est renèssidu. E imoe sa Cup nch'est incassiada
intre su blocu natzionalista de Junts pel sí, chi ddi pedit craresa e
detzisiones lestras, e sa crèschida de cunsensos pro su blocu
autodeterminista de Ada Colau, chi est abbaidende dae sa ventana de su
munitzìpiu Bartzellonesu.
