 |
| Deretos Ansa. URL imàgine |
Arriscant totu in unu de si torrare a disabudos, sos 80 dipendentes de
Iperpan, unu intre sos supermercados prus mannos de Casteddu. Arriscu
ingendradu a pustis chi su mere de sos locales in ue est aposentada sa
butega, su notàriu Alberto Floris, at presentadu istàntzia de isfratu
contra a su grupu cummertziale Superemme Spa.
Eris, sero sero,
sena pèrdere duncas mancu un'ora de traballu, sos operajos ant
manifestadu s'anneu issoro cara a su Palatzu cumonale, pro rechèdere cun
fortza e urgèntzia s'interventu de s'amministratzione. In pare cun
issos, pro solidariedade, b'aiat fintzas unos chentu traballadores de su
matessi setore. «Custu supermercadu rapresentat su 15% de su faturadu totale de de su grupu cummertziale - at decraradu Giosepe Atzori de su sindacadu Fisascat Cisl - s'isfratu
diat àere comente cunsighèntzia sa serrada e diat èssere unu dannu
sotziale pro totu sa tzitade. Dannu chi non connoschet antepostu».
Sos
sindacados de categoria ant addobiadu sos cabu-grupu de su Consìgiu
comunale chi, a su chi narat su segretàriu generale de sa Filcams Cgil, Sergio Codonesu,«si
sunt impinnende pro nch'ammaniare una rechesta a su sìndigu Zedda pro
chi pighet in manos sa chistione e bi pòngiat rimèdiu sustenende
s'optzione de sa clàusola sotziale». Est a nàrrere chi, si a bias bi
diat intrare àteru operadore cummertziale in su matessi logu in ue oe
b'est Iperpan, si devet impinnare a sarvare sos traballadores
pighende·los suta su cumandu, sa ghia e s'amparu suos.
Sos
matessi sindacados ant a addobiare a Màssimu Zedda su 9 de su mese de
Nadale. Su 4, semper de Nadale, est fissada imbetzes s'udièntzia de
isfratu in su Tribunale .
