de Lisandru Beccu
 |
| Deretos Alliance/Abaca. Url imàgine |
Armas prodùidas nessi in 25 paisos: Rùssia, Tzina, Istados unidos e paritzos istados de s'Unione europea. Su raportu de Amnesty international faeddat de tràficos de armas conca a s'Iraq. Fruniduras regulamentadas male e controllos belle assentes ant agiuadu s'Istadu islàmicu
a fraigare unu arsenale de morte capatzu de ingendrare crìmines de
gherra contra a s'umanidade.
A pustis de àere conchistadu sa tzitade de
Mosul, in su mese de làmpadas de su 2014 s'Istadu islàmicu est
intradu in possessu de una cantidade manna de armas. Munitziones, armas e veìculos de fabbricatzione internatzionale, su
prus de sas bortas prodùidos in sos Istados unidos e impreados pro
conchistare àteros giassos de Iraq e Sìria. Totu materiale impreadu pro
ochìere, torturare, secuestrare e isburvare mìgias de pessones.
Una
chistione sena controllu perunu, fuida dae sas règulas e dae sos
protocollos de gestione de sos trasferimentos e de sas importatziones.
Su raportu de Amnesty international documentat chi sas armas
sunt arribadas a Iraq dae nessi 25 paisos, mescamente Iua, Rùssia e sos
paisos de s'ex blocu sovièticu. Fruniduras a bias pagadas cun su
petròliu, a bias fatas cun acordos intre Pentàgonu e defensa irachena e a
bias donadas dae sa Nato.
Armas de cada casta: mìssiles anti-carru
ghiados, veìculos armados, fusiles de assàchiu comente sos Ak47 russos,
sos M16 e sos Bushmaster americanos. Armas chi non s'ischit a ue nche
siant fertas.
De sas armas chi impreant a fitianu sos terroristas
de Daesh, sas prus las aiant prodùidas in sa muta intre sos annos '70 e '90. A
custu s'est agiuntu su fatu chi sos jihadistas ant cumintzadu a
prodùere armas pro contu issoro: razos, mortàios, granadas, autobombas.
Su flussu, duncas, est cumintzadu in sa segunda parte de su sèculu
coladu, firmende·si in sos annos '90, a cajone de s'embargu impostu dae
sas Natziones unidas.
Posca in su 2003 su tràficu est torra aumentadu,
alimentadu dae s'invasione americana e duncas dae sa gherra. Intre su
2011 e su 2013 sos Istados unidos ant serradu cuntratos pro milliardos
de dollaros pro sa frunidura de 140 carros M1A1 Abrams, deghinas de
aèreos de gherra F16, 681 mìssiles terra-àera e àteros trastes bèllicos.
In s'acabbu de su 2014 b'at arribadu àteros cuntratos pro unu totale de
500 milliones de dollaros de armas lèbias e munitziones pro s'esèrtzitu
irachenu. Sa corrutzione in intro de su personale militare at fatu su
restu. S'arriscu chi sas armas nche potzant rùere in manos perigulosas
est artu.
S'Itàlia non nch'est in foras dae custos giogos, su
raportu nos ammustrat chi intre sos annos '80-'88 e, a su chi narant sas
fontes ufitziales americanas chi s'agatant fintzas in lìnia, s'istadu
italianu at frunidu armas siat a s'Iraq e, in manera prus pagu
trasparente, fintzas a s'Iran.
Su restu est istòria reghente.
