 |
| Erdogan e Putin in su 2012. Deretos lìberos. Url imàgine |
Sa noa de custu mangianu no est una noa cale si siat. Sa ghetada a
terra de un'aeroplanu militare russu chi, a su chi narat Mosca, non fiat
bolende in is chelos turcos, si nch'insertat a mala gana in sa prima
pàgina de cale si siat giornale. Inghiriada dae pregontas, dudas e
timòrias. Putin at chistionadu de «istocada a palas» annanghende chi no at a bajulare prus «atrotzidades che a custa». Pro parte sua Èrdogan at pedidu a is àteras natziones alleadas unu summit de sa Nato.
«Imbetzes de nos cuntatare - custa sa reatzione de su presidente russu -,
sa Turchia cheret chistionare de s'intzidente cun is sòtzios de
s'alleàntzia atlàntica comente chi nch'aerent ghetadu a terra
un'aeroplanu issoro. Bolent chi sa Nato agiuet a Daesh?».
In medas
narant chi custa cosa fiat prevìdida a dae chi su regime turcu est
gioghende sa partida sua (finamentas tràmite sa Brigada turcomanna)
contra a su de Assad. E a dae chi sa Rùssia est sustenende su guvernu
ufitziale sirianu.
Ma ite ddoe at a àere dae como in susu? Comente s'at a
isvilupare sa cuntierra? In is ambasciadas (in sa russa de Ànkara e in
sa turca de Mosca) ddoe at mùtria mala; Putin si nch'est mòvidu dae
Teheran in ue fiat; su ministru de is afares èsteros Lavrov nch'at
cantzelladu su biàgiu a Turchia prevìdidu pro cras. Ma s'otzidente si
nch'at a fàghere tragiare dae Èrdogan in una gherra semper prus manna o
sa Turchia (e in pare cun issa finamentas s'Aràbia saudida) at a èssere
isolada semper de prus?
Putin at faeddadu de «istocada a palas»
ca ddoe at un'acòrdiu intre sa Rùssia e is Istados unidos pro gestire sa
situatzione. E, mancu a ddu nàrrere, sa Turchia nch'est in foras dae
s'arresonu. Èrdogan est mòvidu dae su disisperu, ca ischit chi Obama non
podet fàghere a mancu de Putin, ma custa mossa disisperada no at a
mudare (a sa segura, a su nessi finas a imoe) s'àndala de su guvernu a
isteddos e istrìscias, oramai incapatze de ofèrrere una solutzione in
s'oriente probianu.
Chi non siat galu chitzo pro chistionare de sa de
tres gherras mundiales?
