 |
| Deretos lìberos. Url imàgine |
«Missione acumprida». Pagu prus o mancu est su chi narant is esponentes
màssimos de sa polìtica e de s'economia italiana a pustis de 184 dies de
Expo. Sa manifestatzione, dd'ischimus, moviat dae sa punna de «nutrire
su praneta».
Su presidente de sa Repùblica italiana Sergio Mattarella,
chi at decraradu a manera ufitziale sa serrada de sa manifestatzione, a
s'obietivu ddoe est torradu narende chi «su deretu a su màndigu cheret
nàrrere paghe» e chi «non si podet atzetare s'isbàida de is resones de
su benèssere».
Ma àteros meda ant faeddadu mescamente de sa renèssida de
s'espositzione. Gasi su primu ministru Renzi e su sìndigu de Milanu
Giuliano Pisapia. Ma finamentas "su tzeleste" Formigoni chi, tràmite unu
tweet suo, at naradu chi issu emmo chi bi fiat a su comintzu de Expo (e
chi duncas is àteros «sunt arribados 4, 5, 8 annos a pustis»).
Paret,
tando, chi su problema siat a si cabarrare is 21 milliones e mesu de
bisitadores e non su de cunfrontare custa tzifra cun s'obietivu de 24
milliones de billetes, netzessària pro nche essire in parègiu.
Torrende a
sa punna, ddoe at de nàrrere chi Caritas, Slow food e Oxfam Itàlia no
ant firmadu sa "Carta de Milanu" ca, intentziones bonas a banda, «non
faeddat de sa propiedade de is sèmenes, de s'abba comente bene comune e
non previdet impinnos cuncretos pro guvernos e multinatzionales».
