Duos kamikaze, a pustis de sas tres de sero, ant mortu 11 pessones in
unu mercadu de Kano, una de sas tzitades prus mannas de sa Nigèria.
Fiant duas fèminas intre sos 11 e sos 18 annos e, cando si sunt fatas
esplòdere, una fiat in intro de su mercadu e s'àtera in s'intrada. A
como, nemos at rivendicadu s'atentadu, ma sa tzitade nigeriana no est
noa a sas bombas de Boko Haram. In su mese de Ghennàrgiu de su 2012, in
su matessi mercadu, sos terroristas aiant mortu 185 innotzentes.
Martis
coladu imbetzes, in sa tzitade nord-orientale de Yola, prus de 30
pessones las ant mortas in sa matessi manera, ma est petzi unu de sos
ùrtimos atacos. In su mese de Trìulas, semper una fèmina kamikaze s'est
fata esplòdere a curtzu de una moschea, ma sa borta bellegasi non b'at
àpidu perunu mortu. Un'annu a como imbetzes, un'atacu, custa borta in
intro de una moschea, aiat mortu prus de 100 pessones.
S'ìnditze globale
de su terrorismu narat chi finas a como sas vìtimas de Boko Haram sunt
6644, medas, tropu. Unu nùmeru chi nche ponet su grupu terrorìsticu in
cùcuru a sa classìfica de sos prus perigulosos e mortales.
In
prus, a ismanniare sos problemas de sa Nigèria si bi ponent fintzas sos
funtzionàrios de su guvernu. Martis su presidente at fatu arrestare unu
consigeri de sa seguresa chi si nch'at furadu una parte de sos fundos
destinados pròpiu a sa luta contra a su terrorismu. Unu problema in fatu
de s'àteru.
