 |
| Unu legionàriu. Deretos lìberos. Url imàgine |
Intre is critèrios impreados pro seletzionare un'acadessimentu, e
duncas pro ddu furriare a noa, ddoe nd'at unos cantos chi ponent agigu
de oriolu. A su nessi a nois. Unu de custos pertocat su livellu
geràrchicu de is sugetos interessados. Cosa chi, a dolu mannu, podimus
iscumproare in custas dies.
In sa gazeta amus iscritu de is atentados de Bèirut e de Parigi, dende su matessi tributu a is mortos de unu e de s'àteru. Ma sa gazeta est sa gazeta, petzi un'esperimentu giornalìsticu in limba sarda. In su giornalismu de gabbale (e in custa categoria ddoe at a èssere finamentas Libero finas a cando s'Òrdine dd'at a lassare lìberu de ofèndere) su critèriu est impreadu che a s'abba pro su the.
Est unu critèriu chi naschet dae una bisione
etnotzèntrica de màdrighe europea e/o otzidentale e chi agiuat
s'opinione pùblica a fàghere unu chircu a inghìriu de una natzione a
pustis chi nche dd'intrat sa gherra a intro de domo. Bastis chi siat una
natzione de sèrie A, naturale.
E custu critèriu matessi nos agiuat a
nos nch'ismentigare su ruolu de sa natzione mentovada in s'istòria sua,
colada e reghente. Legionàrios, colònias, limba frantzesa peri su
mundu, esperimentos nucleares in Mururoa. E posca bombas frantzesas in
Lìbia e in Sìria ca nât chi Gheddafi fiat unu tirannu e Assad sighit a
ddu èssere finas a cando at a abarrare biu. E posca afares cun àteros
tirannos che a is sauditas.
Cosigheddas. Cosigheddas de nudda pro
chie galu cuat e, finas in Sardigna, faeddat de una superioridade de is
democratzias nostras cunforma a...cunforma a ite? Cunforma a sa gente
sustènnida e armada dae s'otzidente matessi?
Cunforma a is pòpulos
privos de is deretos sotziales e tziviles prus elementares a cajone de
is polìticas imperialistas de s'otzidente? Cunforma a sa gente chi cada
bia si depet iscusare ca tenet un'àtera religione?
Nât chi semus in
gherra. Ma custa gherra naschet in is concas nostras anneuladas dae
custos pensos dominantes. S'ispera, a dae chi semus in Sardigna, est chi
dd'agabbemus de giogare a custu gioghitu oriente/otzidente.
Ca si
cherimus èssere otzidentales diat bastare a pònnere is bator moros peri
is bases militares e semus a caddu.
