 |
| Deretos Liberation. Url imàgine |
«Ofesas is vìtimas», «Parigi in manu a is violentos», «Parigi, s'iscussertu de sa birgòngia».
Gasi tìtulant (pagu prus o mancu totus) is giornales italianos de oe in
pitzu de is manifestatziones contra a su Cop21, su summit de 150
delegatziones natzionales imbènnidas pro chistionare de clima. Gas serra
a un'ala, duncas, e gas lacrimògenos a s'àtera.
Ma,
comente costumant a s'ispissu cun sa còntiga de sa gherrìllia urbana,
is mèdios massivos non ant mentovadu is resones de is manifestantes
cunforma a chie, dae Kyoto in susu, pagu o nudda at fatu pro s'ambiente.
Pro nàrrere: is Istados unidos non ratificheint su
protocollu sighende a prodùere 5mìgia e 800 tonnelladas de diòssidu de
carbòniu cada annu; su Cànada si retireit in antis de acumprire sa prima
fase de impinnos; Rùssia e Giapone non pigheint parte a sa segunda
fase.
Duncas non si podet ischire ite proponent is
manifestantes contra a su Cop21, finamentas ca Hollande su chi aiat de
nàrrere dd'at naradu: «elementos de istorbu chi nudda cumpartzint cun is defensores de s'ambiente».
A sa segura sa de eris fiat finamentas una cuntestatzione a s'istadu de urgèntzia («Politzia in totue, giustìtzia in neddue», «Politzia natzionale, politzia de su capitale», intre is islogan).
Sa
martza no est mancu mòvida, is manifestantes carrigados, unos 300 is
arrestos. Perunu istorbu a is cabos de istadu, duncas. E nemmancu a is
sotziedades chi ant isponsorizadu: Edf, Bnp Paribas, Air France, Gdf
Suez, cunsideradas che a is prus mannas incuinadoras dae is
dimustrantes.
