Oramai su carru armadu ruju-biaitu no lu firmant prus. Sos òmines de
Rastelli in domo ant semper bìnchidu, oto partidas e 24 puntos. Su
rodàgiu nch'est acabbadu e sa vetura at cumintzadu a cùrrere conca a sa
promotzione in Sèrie A. S'Ascoli, formadu dae òmines de importu che a
Canini, Bellomo e Cacia, no b'est resèssidu a frenare sa cursa de sos
sardos, arrendende·si a pustis de mesora de giogu.
Pariat bastante
echilibrada sa partida in su cumintzu, sos marchigianos b'ant proadu
una paja de bortas a nche colare in vantàgiu, ma sos atacantes non sunt
istados bonos a nche ghetare sa botza a intro de su sacu. Su Casteddu
tando si nch'at leadu semper prus tretu e agiomai nche marcat su
vantàgiu cun Melchiorri. Unu bete de destru nch'iscudet a sa traessa e
torrat in segus, momentu de glòria rinviadu. Unu minutu a pustis, semper
s'atacante de Trèia li faghet de isponda a su cumpàngiu de repartu
Giannetti chi tirat in porta de prima intentzione. Su portieri aversàriu
paret prontu, ma sa botza li rimbaltzat in dae in antis e si nche
l'iscàdriat dae manos. 1-0 pro su Casteddu. S'Ascoli est in dificultade e
si bidet. Tres minutos a pustis Joao Pedro, currende che macu,
nch'intrat a intro de s'àrea, ma agatat sas manos de Svedkauskas chi
nche l'imbolant a terra. S'àrbitru non tenet dudas, tiru de penalidade.
Est su giogadore brasilianu etotu a lu trasformare e a raddopiare su
vantàgiu.
Su segundu tempus imbetzes paret totu un'àtera cosa.
S'Ascoli at prus gana de giogare e cheret adderetzare sa partida.
Bellomo, in duas bortas bi proat a dare un'ispera a sos suos cun duos
bellos tiros, ma Storari est atentu e respinghet sa botza in ambas sas
ocasiones. Sos bisos de remonta isparint cando Joao Pedro nche marcat su
de tres. In velotzidade si nch'ispinghet sa botza a dae in antis,
colende·nche sos defensores, e cando si nche presentat cara a su
portieri, nche la còllocat cun pretzisione in su segundu palu. 3-0 e
totus a domo.
Sos sardos in classìfica abarrant comente fiant, a
bator puntos dae sa segunda (su Crotone). Sàbadu chi benit tocat de
bìnchere in Brèscia pro cunfirmare su momentu positivu.
Casteddu:
Storari, Pisacane, Ceppitelli, Krajnc, Murru, Dessena, Di Gennaro (68'
Tello), Fossati (82' Salamon), Joao Pedro, Giannetti (64' Farias),
Melchiorri.
Allenadore: Màssimo Rastelli
Ascoli:
Svedkauskas, Mengoni, Canini (5' Del Fabro), Antonini, Almici, Pirrone,
Carpani, Jankto (68' Pecorini), Giorgi (75' Petagna), Bellomo, Cacia
Allenadore: Devis Màngia
Gol: 28' Giannetti, 31' Joao Pedro (P), 86' Joao Pedro
