Su Casteddu nch'est torradu dae Perùgia cun unu puntu ebbia, ma sena
subire gol. Sa trasferta sighit a èssere unu puntu dèbile, forsis
s'ùnicu, de sos sardos. S'ùrtimu gol marcadu in foras de domo nche
l'agatamus in sa partida contra a s'Entella, su 22 de Cabudanni. Ma
contra a sos umbros non si podiat pretèndere chissai ite, in su Renato
Curi no ant subidu mancu unu gol. S'allenadore Rastelli nât chi at bidu
megioros e at naradu chi s'iscuadra at fatu passos a dae in antis
mescamente in sa fase de cuntenimentu.
Su primu tempus de sa
partida est belle totu de marca ruju-biaita. Giai in sos primos 12
minutos sos atacantes sardos si nche presentant pro duas bortas a dae in
antis de Rosati, ma si faghent ipnotizare. Sos tiros de Melchiorri in
antis e Farias a pustis, sunt tropu tzentrales e su portieri nche
respinghet sa botza. Sos rujos de Bìsoli ant un'ocasione cun Ardemagni,
ma su tiru nch'iscudet a su petorru de Murru, carignat su palu e
nch'essit a foras.
In su segundu tempus Di Gennaro bi proat cun unu tiru
dae a tesu e cun unu tiru lìberu, ma li mancat fortuna e pretzisione. A
ùrtimu bi proat fintzas Giannetti cun unu tiru a fùrriu de destru,
chirchende de indiritzare sa partida conca a su Casteddu, ma sa botza
nche bàrigat sa traessa.Acabbat gasi sa partida, unu zeru a zeru chi
cuntentat a totus e chi mantenet sos òmines de Rastelli semper a unu
puntu dae su primu postu. Fintzas su Crotone at paregiadu, ma su Cesena
como tenet sos matessi puntos de sos sardos. Si torrat a giogare su duos
de Santandria contra a su Vicenza, tocat de si nche torrare a leare su
primu postu.
Formatziones
Perugia:
Rosati, Del Prete, Volta, Belmonte, Comotto, Zebli, Della Rocca, Fabinho
(46' Drole), Parigini (86' Zapata), Spinazzola (46' Taddei), Ardemagni.
Allenadore: Pierpàolo Bìsoli
Casteddu:
Storari, Murru Krajnc, Ceppitelli, Pisacane, Tello (80' Fossati), Di
Gennaro, Dessena, Joao Pedro (59' Giannetti), Melchiorri (71' Barella),
Farias.
Allenadore: Màssimo Rastelli
