 |
| Wikimedia |
Su parlamentu gregu at aprovadu sa prima parte de su pranu nou de
agiudos cuncordadu in su mese de trìulas cun sa Tròika (Unione europea,
Banca tzentrale e Fundu monetàriu internatzionale).
In 154 subra 300 ant
naradu chi emmo a contraventziones prus artas pro is evasores, ma
finamentas a tassas noas e a s'aumentu de s'edade pro andare in
pensione. In intro de su 2022 totus is gregos bi diant dèvere cròmpere a
67 annos. Mesuras netzessàrias pro otènnere 2 milliardos de èuros. Su
pachete est istadu votadu dae sa coalitzione Syriza/Gregos
indipendentes. Pasok, Democratzia noa e To Potami (su riu) aiant votadu
chi emmo su mese de austu, ma imoe ant votadu contra. Un'àtera parte de
su pranu at a èssere votada su mese ch'intrat. Tando s'at a chistionare
finamentas de privatizatziones.
