de Lisandru Beccu
Naradu
l'aìamus, cando giogat in domo su Casteddu est unu trenu, làstima però
chi finas a como apat subidu semper gol, francu in sa prima partida.
Però tocat de cumprèndere comente mai in trasferta s'iscuadra si
trasformat, a bortas sos giogadores de Rastelli non bi resessent a
prodùere giogu. Sa partida cun su Trapani imbetzes est istada pagu prus
de una passigiada e si nche podiat acabbare cun unu resurtadu fintzas
prus grae.
Su Casteddu est perigulosu dae sos primos minutos e sa
rete de su vantàgiu no istentat a arribare. Melchiorri aprofitende de
una faddina defensiva, oferit unu passàgiu traessu a Farias, chi fora de
tempus e a manera drolla, andende e ruende, bi resesset a nche
istichire sa botza a intro de sa porta. Pagu tempus a pustis su
brasilianu proat a raddopiare, ma Nìcolas si faghet agatare prontu e
nche serrat cada cugione. Farias paret indimoniadu. A su de 30 minutos
nche collit unu passàgiu de Melchiorri, nch'iscartat tres defensores e
marcat su segundu gol tirende a su palu prus a tesu. Non si firmant prus
sos sardos, b'at tempus fintzas pro su de tres gol. Di Gennaro nche
ponet in mesu de s'àrea unu tiru dae su cugione, Pisacane si faghet
agatare prontu e cun sa conca nche marcat su 3-0.
Su segundu tempus
paret prus pàsidu, sos ruju-biaitos chircant de amministrare su vantàgiu
finas a s'acabbu de sa partida, ma su Trapani no est de acordu. Sos
sitzilianos bi creent ancora e a su de 48 minutos Rizzato faghet trèmere
sa traessa cun unu bete de tiru dae su lìmite de s'àrea. Su gol de sa
bandera arribat a su de 57 minutos. Scognamìglio cun sa conca antìtzipat
a totu cantos e incùrtziat su passivu. Ma non bastat. Su Trapani
càmbiat istrategia e si nch'isbilàntziat a dae in antis pro chircare de
nche recuperare sa partida, ma su Casteddu cun sos cuntratacos arriscat
unu muntone de bortas de marcare àteros gol. Gasi acontesset a su de 83
minutos, Farias mòvidu in cuntratacu, dat sa botza a Giannetti, chi cun
unu destru a fùrriu inferchit a Nìcolas, serrende definitivamente sos
giogos.
Torrant a bìnchere sos sardos e abarrant semper a unu
puntu dae su Crotone, chi est primu in classìfica. Sa trasferta de
martis chi benit at a èssere contra a su Perùgia de Bìsoli, chi at
bìnchidu in Terni su clàssicu umbru. Sas partidas a tesu dae domo, pro
sos òmines de Rastelli sunt semper un'incògnita. Chissai chi apant
imparadu sa letzione de Novara, amus a bìdere.
Formatziones
Casteddu:
Storari, Pisacane, Krajnc, Ceppitelli, Murru, Di Gennaro (82' Tello),
Dessena, Fossati, Joao Pedro (88' Barella), Farias, Melchiorri (74'
Giannetti).
Allenadore: Màssimo Rastelli
Trapani:
Nìcolas, Rizzato, Scognamìglio, Pigliarulo (81' Accardi), Eramo, Barillà
(31' Raffaello), Scozzarella (84' Scozzarella), Ciaramitaro. Coronado,
Sparacello, Citro.
Allenadore: Serse Cosmi
Gol: 23' Farias, 30' Farias, 42' Pisacane, 57' Scognamìglio, 83' Giannetti
