Est de paritzas dies a oe sa noa de
una multa de 19.500 èuros pro traballu nieddu, intregada a unu
bingiateri chi si fiat faghende agiudare a binnennare dae sos amigos e
dae sos parentes. Sa faina est acontèssida in Itàlia, pro èssere
pretzisos in provìntzia de Cùneu. Giai s'ischit, sos tusòrgios, sas
ghetadas de bòveda, su de masellare su porcu e gasi etotu sa binnenna
sunt ocasiones pro nche colare una die in cumpangia intre amigos e
parentes a sa manera de s'agiudu torradu, in ue regnat sa solidariedade
intre amigos e parentes. Ma custa borta sos ispetores de su traballu,
acumpangiados dae sos carabineris ant lassadu sinnale malu, arruinende
sa chi deviat èssere una festa.
Sos parentes intro de su de bator grados
no ant àpidu problemas, ma pro sos amigos sa multa est istada
inevitàbile. Cosas de non crèere.Ma sa lege in matèria ite narat?In
pràtica a su chi narat s'artìculu 74 de su còditze tzivile, sunt
parentes in lìnia dereta sas pessones in ue s'una est discendente de
s'àtera. Sunt parentes in lìnia cullaterale, imbetzes, sas pessones chi
ant unu ramu a cumone, ma non sunt discendentes s'una dae s'àtera.
Sa
norma definitiva chi regulamentat custas operatziones ocasionales de
traballu, in Itàlia l'ant definida cun su D.l. 5/2009, chi posca ant
cunvèrtidu in lege (n. 33/2009). Duncas istabilit chi, in custas fainas,
sos operadores chi ant a pòdere agiudare sunt sos parentes intro de su
de bator grados.
Pro cumprèndere mègius, sos parentes in lìnia
dereta sunt: sos de primu gradu babbu e fìgiu, de segundu gradu giaju e
nebode, de su de tres grados bisaju e fìgiu de nebode e de su de bator
grados trisaju e nebode de nebode. Sos parentes in lìnia cullaterale
sunt: de segundu gradu su frade, sos de tres grados su tziu e su nebode e
sos de bator grados su fìgiu de su nebode, su fradile e su fìgiu de su
bisaju. A ùrtimu bi sunt sos afines, chi sunt sos parentes de su còjube.
Duncas sos afines de segundu gradu sunt su connadu, sos de tres grados
su fìgiu de su connadu e su tziu de su còjube, su de bator grados su
fradile de su còjube.
Pro totu custas categorias e grados de
parentela non b'at perìgulu de si nch'agatare sa giustìtzia in intro a
sa propiedade, ma pro sos amigos, mancari istrintos tocat de fàghere
galu atentzione.
