de Maurìtziu Sale
 |
| Deretos ANSA AP |
Cun un'inglesu semper prus improbàbile,
ma cun s'allega sua sòlita, lestra e imboligosa, Renzi at chistionadu
cara a su cunsessu generale de sas Natziones aunidas. «S'Itàlia est pronta a si pigare unu ruolu de ghia in sa chistione lìbica», at naradu cun sa matessi barrosia naturale chi costumat a bogare in televisione. «Amus bidu su fallimentu e s'inèrtzia de sa Sìria » e como agiunghet chi tocat a àere «s'atza
de pigare a ambas manos sa realidade: Isis est un'inimigu perigulosu
chi nch'est cròmpidu belle a su liminàrgiu de domo nostra. Non podimus
isetare prus». Pustis duas paràulas de tzircustàntzia finas pro sa chistione israelo-palestinesa «non
b'at a alternativa a su diàlogu, mantenende semper bia sa punna chi sos
duos Istados potzant bìvere costàgiu a pare in paghe e seguràntzia».
Faeddos
istudiados, nen gosi nen gasi, pro positziones semper a caddu de sos
disinnos internatzionales chi essint dae su patu atlànticu. Peruna balia
de istatista duncas, peruna responsabilidade chi potzat nàschere dae su
chi s'Itàlia at fatu, est faghende e podet galu fàghere in Lìbia o in
s'oriente mesanu. Petzi alliniamentu cun su sentidu comunu e perunu
corfu de cherbeddu chi no esseret isetadu e chi nche poderet bortulare
sa platea sonnis sonnis in su Palatzu de bidru. Renzi istùdiat,
est abbistu e a nàrrere non narat mai nudda chi potzat èssere
contraìghidu, ma pustis a fàghere giai faghet cosas chi lassant su
singiale. Bonu o malu chi siat, prus malu chi non bonu finas a oe, si
pensamus a s'iscola, a sa sanidade, a sa lege eletorale. Ma custas sunt
chistiones italianas chi cun sa polìtica istràngia paret chi pagu
b'intrent. E imbetzes nos dant sa mesura giusta de cantu tirat su Primu
ministru italianu e de cantu pesu potzat àere in unu cunsessu
internatzionale a dae chi sos presentes non s'ant iscorgioladu sas
manos, tzochende·las. Forsis at pensadu chi torrende a pigare in limbas
sos faeddos de Paba Frantziscu diat àere adderetzadu su tiru «Repito
sas paràulas chi su Paba, unas cantas dies a oe, at pronuntziadu pròpiu
inoghe. Paghe, bastat gherras, catzare·nche sa pena capitale e
printzìpios tziviles cumpartzidos in totu su mundu».
Amantiosu
de sas tzitatziones, ca non nos nd'aorrat una, dae Machiavelli a
Togliatti, a Gandhi, a Fedez, a Vasco Rossi e como su Paba, forsis at
pensadu chi sa balia e su messàgiu cuntènnidos in su pensu suo nche
poderent colare paris cun su sonu galanu de sos faeddos angenos. Sas
paràulas, finas si pronuntziadas in logu nòbile e solenne comente a
s'Assemblea generale de sas Natziones aunidas, nche devent cròmpere a
atziones cuncretas in sa realidade territoriale e umana a ue sunt
indiritzadas. Isetemus a bìdere sa positzione reale de s'Itàlia cunforma
a sos inditos de Matteo Renzi. Semus totus isetende, su mundu est
isetende.
