S'anàlisi fata dae su cuotidianu ispanniolu Público,
pro sas eletziones de su 27 de Cabudanni, at cunfirmadu sa previsione
de majoria assoluta pro sas fortzas indipendentistas in su parlamentu
catalanu. Difatis, sos sèberos polìticos de su guvernu Rajoy e sa
campagna velenosa operada dae su partidu suo, su Pp (Partidu populare),
ant ingendradu un'efetu contràriu. At a pèrdere su 29% de sos votos e at
a dèvere rinuntziare a unos sete-oto parlamentares.
S'istùdiu ammustrat
chi su nùmeru de sos eletores chi ant a dare sa preferèntzia issoro a
sos partidos soberanistas ant a crèschere de su 10%, colende·nche dae unu
millione e setighentamìgia a unu millione e noighentamìgia, ma su
cunsensu at a crèschere petzi pro sa manca indipendentista, rapresentada
dae su Cup. A s'àtera ala imbetzes, sos Ciutadans (ispanniolistas
de tzentru-dereta) dùplicat sos votos rispetu a su 2012, recuperende
fintzas carchi puntu pèrdidu dae su Pp. Balàngiat pagu, imbetzes, su Sí
que Es Pot, colende·nche dae 13 a 16 sègios. Sa presèntzia de Podem no est
gasi determinante comente si pensaiat, ma in cada manera at a èssere una
campagna eletorale de interessu e custas binti dies imbenientes nos
l'ant a ammustrare.
