de Maurìtziu Sale
Europa entidade aunida cando si
tratat de impònnere doveres e òbligos a sos istados membros o cando
devet intervènnere in àmbitu internatzionale finas cun atziones
segretadas, entidade disunida e incoerente cando si tratat de amparare
deretos, internos o esternos chi siant. Custa est sa descritzione de sa
figura europea chi nch'essit a pìgiu dae
un'intervista chi Bashar al-Assad at cuntzèdidu a s'imprenta russa in
Damascu. Intervista chi tendet a pònnere s'atzentu subra de sas
responsabilidades europeas in contu de terrorismu internatzionale.
Pàrreres duncas, ma chi tenent unu "pesu ispetzìficu" grae si si pensat dae ue nche crompent.
Emigrantes - «Pighemus s'aflussu massivu de sos pròfugos. Est responsabilidade primàrgia de s'Europa - at decraradu - chi at sustènnidu, sighit a sustènnere e cugùgiat su terrorismu. Issa definit sos terroristas comente moderados e los partzit in grupos , ma sunt totu estremistas». Paràulas de venenu sas de su presidente sirianu chi cunfirmant petzi su "totus contra totus" chi s'est ingendradu intre sos guvernantes a pustis chi su mundu de sos mìseros, de sos poberitos s'est mòvidu in massa in chirca de un'ispera. Unu giogu istitutzionale de trasferimentos de responsabilidade duncas, in ue nemos tenet curpas o responsabilidades e chi, finas a como, non tenet mancu règulas tzertas ne a oriente ne a otzidente.
Terrorismu - «S'Otzidente e sa Turchia frunint
armas e sustentamentu a sos "qaedistas" de Jabhat al-Nusra e a sos
terroristas de Isis chi sunt cumbatende in Sìria - sighit Assad - e
sa cooperatzione intre s'otzidente e Jabhat al-Nusra est cosa
tzertificada. Nois, totu cantos semus, ischimus chi al-Nusra e Isis
retzint sas armas, dinare e finas òmines de suportu dae sa Turchia e chi
custa lu faghet pro afortire sos raportos chi tenet cun s'otzidente».
Iran - Ischimus chi s'Iran sustenet su guvernu de Damascu cun sa frunidura de armas ma, «su
suportu militare no est su chi unos cantos mèdios otzidentales nche
cherent fàghere colare peri s'opinione pùblica mundiale», narat Assad. «No
est un'imbiu de unidades militares iranianas in Sìria, ma un'iscàmbiu o
cuncàmbiu naturale de ispetzialistas e istrategas intre Sìria e Iran,
sa cosa est diferente meda. Tenet totu un'àtera balia e su restu de su
mundu diat dèvere èssere capatzu de nche la regòllere. Si non bi
reventit a nche lu cumprèndere sa curpa no est de sa Sìria, sa neghe no
est duncas sa mea».
Collaboratzione cun s'otzidente pro sa luta contra a su terrorismu - «Damascu
est pronta a collaborare cun s'otzidente. Paisos comente sa Turchia, su
Qatar e s'Aràbia Saudita, gasi comente sa Frantza, sos Istados unidos
de Amèrica e àteros istados otzidentales chi sustenent su terrorismu - at in fines puntualizadu Assad - como
no lu podent prus cumbàtere a sa sola. Ca non si podet èssere contra a
sos terroristas e in su matessi tempus èssere a sa banda issoro. Devent
disinnare a cale chirru si cherent tirare e Damascu at a èssere a
disponimentu de chie sèberat sa luta contra a su terrorismu»
