“The book of souls”, est a proa a essire su discu nou de sos Iron Maiden

de Màuru Piredda 

Wikipedia

Nch'at coladu 35 annos dae sa publicatzione de su primu discu issoro. Fiant sos annos de s'“undada noa de s'heavy metal britànnicu” e sos Iron Maiden aiant, dae tando, totus sas caraterìsticas pro devènnere una de sas realidades prus mannas de s'iscena rock mundiale intrea. Como sunt a proa a essire cun su de 16 discos issoro, “The book of souls”, antitzipadu dae su sìngulu “Speed of light”.

In pagos connoschent sas àteras 10 cantzones de s'album (Cd dòpiu e Lp triplu) chi at a cròmpere a sas butegas su 4 de cabudanni, ma sa “prima essida” paret assussegare sos amantiosos de sa Vìrgine de ferru.

Su vìdeu de sa cantzone difùndidu dae su canale ufitziale Youtube (oramai sa mùsica s'iscurtat belle semper in cue) nch'est giai, dae su 14 de austu, a prus de 3 milliones de bìsitas. Chimbe minutos de rock pesante sestados dae sa setzione rìtmica puntuale ammaniada dae Steve Harris (bassu) e Nicko McBrain (bateria) ma sena rinuntziare a sas lìnias melòdicas de sa trìbide chitarrìstica Smith/Murray/Gers e a sa boghe caente e funguda de Bruce Dickinson (chi at bìnchidu dae pagu sa cumbata sua contra a unu tumore in sa limba).

“The book of souls” arribat a pustis de unos cantos discos chi ant  partzidu su giudìtziu de sos sighidores de su grupu inglesu. Su disìgiu de chèrrere un'òpera che a sas de sos annos otanta (che a “Piece of mind”, “Powerslave” o “Seventh son of a seventh son”, pro nàrrere) est mannu e sas aspetativas a inghìriu de custa faina l'acreschent. Amus a bìdere.