de Màuru Piredda
Cun is dimissiones de su primu ministru Alexis Tsipras, a pustis de
sceti sete meses de guvernu, sa Grètzia si preparat a eletziones noas.
Posta a banda, duncas, s'ipòtesi de sa fidùtzia de pedire a su
Parlamentu. Est possìbile chi si votet su 20 de cabudanni.
De custa manera Tsipras diat chèrrere isfrutare sa popularidade chi galu pensat de mantènnere e chi paret tzertificada dae is sondàgios. Is “creditores”, imbetzes, diant prefèrrere una data prus a innedda, a pustis de sa prima verìfica in contu de s'acumprimentu de su programa. «Non semus renèssidos – at naradu Tsipras – a rispetare totus is promissas chi aìamus fatu in campagna eletorale. Pro custu apo a presentare is dimissiones mias e at a èssere su pòpulu a detzìdere». Pro sa manca interna de Syriza su pòpulu su benidore suo l'aiat disinnadu in is eletziones de ghennàrgiu e in su referendum de argiolas. «Su Oxi (nono, Ndr) de su pòpulu gregu chi aiat refudadu duas bias s'austeridade – at naradu Statis Kouvelakis, professore de teoria polìtica in su King's college de Londra – s'at a presentare in cussas eletziones e sa Prataforma de manca, in pare a àteras realidades de sa manca radicale grega, at a dare su cuntributu suo». Sa partzidura est acumprida.
