 |
| ansa.it |
Est cròmpida a su portu de Casteddu sa Siem Pilot, sa nae norvegesa cun
963 pròfugos (676 òmines, 218 fèminas e 69 minorennes) sarbados is dies
coladas in su Canale de Sitzìlia. Su bonu de issos at a abarrare in
tretos de Casteddu. Is àteros ant a èssere partzidos in is àteras tres
provìntzias.
Contra a custu isbarcu s'at pesadu unas cantas boghes dae
su mundu polìticu sardu. Marcello Orrù, eletu in Cussìgiu regionale cun
su Psd'Az (mancari, nât chi, lu frecuentet prus pagu de is àteros) lis
at naradu a Renzi e Alfano chi non trasformet sa Sardigna «in su tzentru
de regorta de s'Europa».
Orrù at faeddadu de «mìgias de istràngios cun
màndigu e allògiu in istruturas cun cada comodidade» e de «33 èuros sa
die chi aiant pòdidu cuntentare is cuntzitadinos nostros». Su
coordinadore regionale de Fratelli d'Italia Sarvadore Deidda at imbetzes
invitadu is sìndigos a si «rebellare contra a s'invasione» invochende
«un'interventu militare in Lìbia pro firmare is isbarcos».
In contu
de invasione sa Stampa at publicadu, duas dies a oe, unu pàrrere de
Alessandro Bechini, diretore de Oxfam: «Ocannu, dae su primu de
ghennàrgiu a su 15 de austu, ddoe at isbarcadu pagu prus o mancu
103mìgia pessones (su 0,17% de sa populatzione italiana), unos milli de
mancu cunforma a su matessi perìodu de su 2014»
