de Màuru Piredda
Gasi siat! Sa Corte de Cassatzione at dadu legitimidade a sa Comuna de
Livorno chi, in su 2010, tràmite s'ufìtziu Tributos suo, aiat mandadu a
sas iscolas paritàrias una cartella esatoriale pro collire s'Ici dae su
2004 a su 2009. Sa contrariedade de sos istitutos si fiat afortiada
gràtzias a sos primos duos grados de giudìtziu chi no aiant dadu resone a
s'amministratzione. Ma pro sa Cassatzione, a dae chi sas famìllias de
sos dischentes pagant, s'iscola paritària figurat che a una atividade
cummertziale.
Est a pagare, como: sos istitutos Santo Spirito e
Immacolata devent torrare a sa Comuna livornesa 422.178 èuros. Pro su
segretàriu generale de sa Cunferèntzia episcopale italiana (sa Cei),
mussegnore Nunzio Galantino, «est una detzisione perigulosa e
ideològica» ca nat-chi andat contra a sa libertade de sèberu in pitzu de
s'educatzione iscolàstica.
Pro su ministru de s'Istrutzione pùblica,
Stefania Giannini, «b'at ite meledare». Sa cuntierra intre iscola
pùblica e privada andat a dae in antis dae cando, pro mèdiu de su
ministru Berlinguer in su 1999, sa paridade iscolàstica at permìtidu de
inghiriare sos inditos de s'artìculu 33 de sa Costitutzione (chi faeddat
de libertade de insegnamentu ma «sena òneres pro s'Istadu»).
