de Màuru Piredda
Su Dipartimentu de preventzione de sa Asl de Tàtari at annuntziadu, oe,
is dispositziones de su Regulamentu europeu 1162 de su 15 de trìulas
coladu in contu de Bse (est a nàrrere su male de sa gasi narada “Baca
maca”). S'Itàlia, imoe, nch'est in intro de is paisos cun s'«arriscu
trascuràbile».
De custa manera finamentas in Sardigna at a èssere
possìbile a mandigare is partes istentinales mègius connotas comente "lu
ziminu", unu de is pratos preferidos dae is tataresos. Si ponet agabu,
de aici, a su secuestru e a sa distrutzione de is partes classificadas
che a “materiale arriscosu”.
Custu resurtu, sighende is paràulas de su
diretore de su Dipartimentu, Franco Sgarangella, benit a segus de «is
controllos pretzisos giutos a dae in antis in custos annos dae s'Asl e
dae s'Istitutu zooprofilàticu de Tàtari».
In su 2014 e in is primos ses
meses de ocannu, cunforma a is datos frunidos dae Marino Solinas
(diretore de su servìtziu veterinàriu Igiene e alimentos) sunt istados
masellados 4.596 fiados controllados dae is servìtzios de sa Asl e
frundidas tonnelladas intreas de matzìmine. Una situatzione chi at
implicadu pèrdidas econòmicas mannas pro is allevadores.
