de Màuru Piredda
Custu mangianu is operajos de Eurallumina ant manifestadu cara a
s'assessoradu de s'Ambiente, in Casteddu, pro pedire s'acumprimentu de
s'iter burocràticu pro sa ripresa de is impiantos de Portescusi. «Amus firmadu totus is acòrdios cun su Guvernu, cun sa Regione e cun is entes locales – at acraridu Antonello Pirotto – e imoe nche semus a sa parte autorizativa».
A su chi narat Pirotto ddoe at de pònnere a cùrrere 185 milliones pro
fàghere traballare 357 operajos (250 in sa cardaia a vapore) sena
cunsiderare fornidores e traballadores de aziendas collegadas. Pirotto,
connotu a is prus pro sa cuntierra televisiva cun s'ex ministru leghista
Roberto Castelli, at agiuntu chi «is tempos de sa burocratzia non sunt is matessi de is chi giuant a is operajos» e chi «tocat de si dare cuidadu pro nche concruire s'iter in intro de su mese de nadale».
