A iscrìere carchi cosa in contu de traballu, oe, Prima die de maju, diat dèvere èssere unu praghere in prus chi no unu dovere. Ma no est fàtzile e mancu discansosu est sena chi s’arrischet de èssere ridìculos o peus, ofensivos. E in Sardigna, si diferèntzia b’at, galu de prus. Fintzas marchende·las, sas disparidades chi bi sunt intre sos sardos e su restu de una repùblica fundada pròpiu subra de su traballu, s’arriscu abarrat e cun issu s’anneu.
S’oriolu de una chistione mala a isòrvere, de una sumana iscurigosa in ue non si nche lughet peruna ispera de sole. Oramai a iscrìere cun profetu e cun sabiesa de traballu e de traballadores, mesches in logu nostru, est contu de sotziòlogos e de antropòlogos. Nessi descrient cun devìtzia e denùntziant su fenòmenu e sas cajones suas. Forsis est finas contu de polìticos o de oreris, chi posca est sa matessi cosa, nessi abbaidende sos resurtados.
Semper e cando totu categorias su prus autoreferentziales, crìticas e, a garbu issoro, finas propositivas, ma incapatzes a parare fronte a su disacatu. Sunt sos nùmeros chi faeddant, b’at pagu ite girare a inghìriu. Sunt sos nùmeros chi traighent, chi iscòbiant, chi iscramant e iscarmentant. Sa Sardigna est una intre sas chimbe regiones italianas cun unu tassu de disabudos chi isporat. Sa disocupatzione, in logu nostru, nch’at barigadu su dòpiu de sa mèdia chi ant registradu a livellu de Unione europea. Si difatis su tassu europeu, su 2016, fiat a s’8,6%, in Sardigna fiat pagu prus o mancu a su 17,3%. Paràula de Eurostat! E sena nos nch’intrare a mesu de sas tulumbas chi pertocant sos giòvanos, sas discriminatziones de gènere, de ratza. Peus de sa Sardigna bi sunt petzi sas enclaves ispagnolas in Àfrica: Ceuta e Melilla.
Sas riformas sunt sighende àndalas inumanas. In custa legisladura nch’ant derrutu conchistas istòricas. Sos ùrtimos ant a èssere semper prus ùrtimos, si balet su gioghitu de faeddos. E no in Europa ebbia. In Brasile, sa noa giai est reghente, si nch’at mòvidu prus de 40milliones de traballadores contra a sas riformas. E puru, pro sas universidades italianas, Utet, Cedam, Giappichelli, Giuffrè, sunt petzi unos cantos intre sos editores chi galu s'atrivint a publicare autores comente a Treu, a Giugni, a Gallino, a Ghera, a Roccella e sos manuales dotos issoro in contu de traballu. Tomos e tomos, pabiru a cuintales in contu de deretos. Deretos de su traballu. E sighint a publicare fintzas suta un'evidèntzia mortale: s'ausèntzia prus iscarada, cunclamada e ufitziale chi non b'at prus perunu deretu «a su», «de su» e «in su» traballu.
Sas riformas sunt sighende àndalas inumanas. In custa legisladura nch’ant derrutu conchistas istòricas. Sos ùrtimos ant a èssere semper prus ùrtimos, si balet su gioghitu de faeddos. E no in Europa ebbia. In Brasile, sa noa giai est reghente, si nch’at mòvidu prus de 40milliones de traballadores contra a sas riformas. E puru, pro sas universidades italianas, Utet, Cedam, Giappichelli, Giuffrè, sunt petzi unos cantos intre sos editores chi galu s'atrivint a publicare autores comente a Treu, a Giugni, a Gallino, a Ghera, a Roccella e sos manuales dotos issoro in contu de traballu. Tomos e tomos, pabiru a cuintales in contu de deretos. Deretos de su traballu. E sighint a publicare fintzas suta un'evidèntzia mortale: s'ausèntzia prus iscarada, cunclamada e ufitziale chi non b'at prus perunu deretu «a su», «de su» e «in su» traballu.
Pagu ite festare duncas.
