 |
Su primu antìtzipu de sa de 35 giorronadas si giogat in Napoli. Sos òmines de Rastelli, oramai sarvos, cherent punnare a concruire bene s'istajone. Sos asulos, imbetzes, sunt a cassa de su segundu postu in classìfica. Non b'at tempus mancu pro sestare sas iscuadras in su campu chi sos campanos sunt giai in vantàgiu. Su marcadore est Mertens a su de duos minutos. S'atacante nche collit su passàgiu traessu de Ghoulam e, cun su pee destru, sinnat s'1-0. Sos pitzocos de Sarri tenent su giogu in manos, ma non resurtant a raddopiare. Su Casteddu, imbetzes, a s'àtera ala, si defensat bene e movet in contratacu. Su primu tempus non nos donat àteras atziones de importu.
In su segundu su Nàpoli torrat protagonista semper cun Mertens, est su de 49 minutos. Su giogadore belga gestit bene sa botza in su lìmite de s'àrea e cun unu tiru forte e bene sestadu nche marcat su de duos. A su de 65 minutos sa traessa negat su gol a Albiol chi, cun sa conca, aiat intzertadu s'addòviu cun sa botza. Festa rinviada petzi de duos minutos. Est Insigne a nche marcare sa de tres. Su passàgiu detzisivu est de Mertens, unu de sos mègius de sa partida. Su disafiu sighit cun tres càmbios pro cada iscuadra, ma su resurtadu non mudat. Petzi a su de 92 minutos arribat su gol ruju-biaitu de sa bandera. Est Farias s'autore. Su giogadore brasilianu si nche presentat cara a Reina e non faddit. Acabbat 3-1.
Formatziones
Napoli: Reina, Hysaj, Albiol, Chiriches, Ghoulam, Zielinski, Jorginho, Hamsik (69' Rog), Callejon, Mertens (77' Milik), Insigne (79' Giaccherini).
Allenadore: Maurizio Sarri
Allenadore: Maurizio Sarri
Casteddu: Rafael, Pisacane, Salamon, Bruno Alves, Murru (71' Faragò), Isla, Ionita (68' Joao Pedro), Barella, Padoin, Sau (77' Farias), Borriello.
Allenadore: Massimo Rastelli
Allenadore: Massimo Rastelli
Gol: 2' Mertens, 49' Mertens, 67' Insigne, 92' Farias
