A pustis de sa sarvesa matemàtica, su Casteddu at semper giogadu cun sa mente lìbera, produende giogu e resurtados. L'at fatu fintzas oe contra a s'Empoli chi, paris cun su Crotone, s'at a dèvere gherrare sa permanèntzia in Sèrie A.
Sos sardos a su de 7 minutos sunt giai in vantàgiu. Su gol est de Marcu Sau chi si lìberat dae sa trampa de su fora de giogu, intrat a s'àrea e, cun su destru, nche marcat s'1-0. Nche colant petzi deghe minutos pro bìdere un'àteru gol. Farias proat s'atzione in soledade e, cun su contributu involontàriu de unu defensore, si sestat sa botza e nch'iscàrrigat a porta su gol de su raddòpiu. S'Empoli tzedet agigu de terrinu e su Casteddu si nch'impossessat de sa gestione de sa botza. Sos sardos sunt postos bene in campu, amministrant bene su disafiu e non li permitint a sos toscanos de èssere perigulosos. Nche colat su tempus e sos òmines de Martusciello creschent. A su de 45 minutos, però, arribat su de tres. Est torra Farias su marcadore. Su brasilianu aprofitat de unu passàgiu detzisivu de Tachtsidis e nche depòsitat sa botza in intro de sa rete.
In sa segunda fratzione sa partida sighit cun s'Empoli prus cumbintu. A su de 53 minutos sos asulos si conchistant unu tiru de penalidade: Murru, intro de s'àrea, tocat sa botza cun su bratzu. Sa trasformatzione, però, a Pucciarelli non li resessit. Rafael intertzetat sa diretzione e respinghet. Sos toscanos creschent e leant coràgiu. In paritzas ocasiones si nche presentant in sos tretos de Rafael, ma non resurtant a concruire. A su de 81 minutos però, Zajc, intradu dae pagos minutos, agatat su gol de sa bandera. Nche colant àteros tres minutos e s'Empoli torrat a abèrrere sa partida. Est Maccarone su marcadore. Sa botza chi l'oferit Zajc est perfeta e su 3-2 est seguru. Non b'at prus tempus pro chircare de paregiare, binchet su Casteddu.
Formatziones
Casteddu: Rafael, Isla, Pisacane, Bruno Alves, Murru, Barella (75' Padoin), Tachtsidis, Farias, Joao Pedro (67' Ionita), Sau (81' Han), Borriello.
Allenadore: Massimo Rastelli
Empoli: Skorupski, Laurini, Bellusci, Costa, Pasqual, Mauri (61' Maccarone), Diousse, Croce, El Kaddouri (51' Krunic), Thiam (75' Zajc), Pucciarelli.
Allenadore: Giovanni Martusciello
Gol: 7' Sau, 17' Farias, 45' Farias, 81' Zajc, 84' Maccarone
