S'ùrtima vitòria in trasferta de sos ruju-biaitos fiat sa de su 26 de freàrgiu contra a su Crotone. Oe sos òmines de Rastelli ant agiuntu àteros tres puntos a sa classìfica, istesiende·si·nche galu de prus dae sa zona ruja chi como resurtat a 18 puntos.
No est malu su cumintzu de sos sitzilianos, giogant sa botza e chircant de prodùere giogu. In s'ìnteri su Casteddu leat sas distàntzias e istùdiat s'aversàriu. Sos rosa-nieddos sunt perigulosos cun Nestorovski, ma Rafael s'illònghiat e li tancat sa ghenna. Su vantàgiu palermitanu arribat a su de 26 minutos cun Gonzalez. Su giogadore costaricanu intertzetat unu passàgiu traessu de Trajkovski e cun su ghenugru nche l'ispinghet a intro. Sos sardos non sunt de acordu cun sa trata chi est pighende sa partida e duncas si nche ghetant a dae in antis. Sas ocasiones no lis mancant a Borriello e a Sau, ma sa botza non nch'intrat. In antis de sa pàusa su Palermo, cun Chochev, diat pòdere raddopiare, ma Rafael e su palu si ponent de acordu pro li negare sa festa a su giogadore bùlgaru.
Sa partida torrat a cumintzare cun su Casteddu in atacu e cun su gol de Ionita. Tiru dae su cugione de Tachtsidis e gol cun sa conca de su tzentrocampista moldavu. Sa partida como est echilibrada, ma sos òmines de Rastelli tenent benzina in prus. Borriello a su de 58 minutos si nch'agatat sa botza in mesu de pees e a pustis de nch'àere sètzidu a sos defensores e a su portieri nche marcat s'1-2. Pro bìdere su de tres gol tocat de isetare a su de 89 minutos. Su marcadore est torra Ionita chi, dae su ladus de manca nch'iscàrrigat a porta su gol de s'1-3.
Formatziones
Palermo: Fulignati, Vitiello, Gonzalez, Goldaniga, Rispoli, Bruno Henrique, Gazzi, Chochev, Pezzella, Nestorovski, Trajkovski.
Allenadore: Massimo Rastelli
Casteddu: Rafael, Isla, Pisacane, Bruno Alves, Murru, Ionita, Tachtsidis, Padoin, Joao Pedro, Borriello, Sau.
Allenadore: Diego Lopez
Gol: 26' Gonzalez, 48' Ionita, 58' Borriello, 89' Ionita
