In sa de 32 giorronadas de Sèrie A su Casteddu dat ispetàculu e binchet su Chievo cun bator gol de iscartu. Est una de sas pagas bortas chi sa porta ruju-biaita est abarrada neta.
Sa partida est animosa giai in sos primos minutos. Chievo e Casteddu si disafiant sena pressiones e petzi cun sa gana de s'ispassiare e de disvagare su pùblicu. A su de 11 minutos Borriello aberit sa dantza de sos gol. Su tiru potente de Tachtsidis est respintu dae Seculin, ma arribat s'ex atacante de sa Roma chi aprofitat de su tapin pro nche marcare s'1-0. Est su de 15 gol in Sèrie A pro su giogadore napoletanu. A pustis de bator minutos acò su gol de Sau. Est Joao Pedro a operare su passàgiu detzisivu. S'atacante tonaresu rugat unu tiru in diagonale e signat su raddòpiu. A su de 20 minutos Meggiorini proat a ismesare s'isvantàgiu, ma su palu non bi lu permitit. Creschent meda sos grogu-biaitos, ma a su de 40 minutos arribat un'àteru gol casteddaju. S'autore est Joao Pedro chi s'agatat in pees unu passàgiu traessu de Ionita respintu dae su portieri aversàriu. Su giogadore brasilianu no at perunu problema a nch'ispìnghere sa botza a intro. Tre minutos a pustis sos veronesos ant un'ocasione manna, ma Rafael s'esaltat cun una grandu parada.
In su segundu tempus s'ispetàculu sighit a un'ala e a s'àtera. Su Casteddu, mancari cun tres gol de vantàgiu, non si firmat e chircat su de bator. Puntègiu chi si manifestat a su de 89 minutos. Est torra Joao Pedro su marcadore. Farias fràigat una bella atzione e ponet a traballare a Siculin chi respinghet su tiru. Sa botza nche crompet a sos pees de su brasilianu de su Casteddu chi signat su de bator cun unu destru sicu e bene sestadu. Acabbat 4-0.
Formatziones
Casteddu: Rafael (91' Colombo), Isla, Salamon, Bruno Alves, Murru, Ionita, Tachtsidis, Deiola (74' Barella), Sau (67' Farias), Joao Pedro, Borriello.
Allenadore: Massimo Rastelli
Chievo: Siculin, Izco, Dainelli, Cesar, Cacciatore (17' Spolli), Hetemaj, Radovanovic, Castro, de Guzman (68' Bastien), Pellissier, Meggiorini (26' Gakpe).
Allenadore: Rolando Maran
Gol: 11' Borriello, 15' Sau, 40' Joao Pedro, 89' Joao Pedro
