Sos sardos proant a si cunfrontare cun s'Inter sena s'istropiare. Sos milanesos apartenent a su grupu de sas iscuadras chi istant mègius. Sa vitòria de su girone de andada est petzi un'ammentu.
In sos primos minutos su Casteddu poderat bene su ritmu de su giogu, resessende a si cuntzèdere fintzas paritzos momentos conca a dae in antis. Sos ruju-biaitos resistent fintzas a su de 34 minutos, cando arribat su vantàgiu de s'Inter. Est Perisic su marcadore. Su giogadore croatu, in intro de s'àrea, aprofitat de unu passàgiu bonu de Banega e sìngiat su 0-1. A pustis de chimbe minutos est Banega etotu a raddopiare. Su tiru lìberu est perfetu, nche bàrigat sa barriera e nch'intrat a porta. In antis de sa pàusa sos sardos resurtant a incurtziare s'isvantàgiu. Borriello, cun sa conca, indiritzat bene in gol su passàgiu traessu de Barella.
Sos lombardos non perdent ocasione pro nche marcare sa de tres. Est torra Perisic su protagonista. S'atacante nche brincat a Di Gennaro e nche ponet sa botza a palas de Gabriel. Sa reatzione de su Casteddu est dèbile e s'Inter torrat a dae in antis. A su de 67 minutos Icardi conchistat unu tiru de penalidade cajonadu dae un'interventu irregulare de su portieri casteddaju. Dae sos ùndighi metros su giogadore argentinu non faddit. Est s'1-4. Sos òmines de Rastelli proant a fraigare carchi cosa de cuncretu, ma non b'at sustàntzia. A su de 89 minutos arribat fintzas su de chimbe. Gagliardini dae foras de s'àrea agatat su gol personale cun unu destru bene sestadu. Acabbat 1-5 pro sos milanesos.
Formatziones
Casteddu: Gabriel, Pisacane, Bruno Alves, Capuano, Isla, Ionita, Di Gennaro (62' Sau), Barella (78' Dessena), Joao Pedro, Borriello (77' Ibarbo).
Allenadore: Massimo Rastelli
Inter: Handanovic, D'Ambrosio, Medel, Miranda, Ansaldi (88' Nagatomo), Gagliardini, Kondogbia, Candreva, Banega (76' Joao Mario), Perisic (73' Eder), Icardi.
Allenadore: Stefano Pioli
Gol: 34' Perisic, 39' Banega, 42' Borriello, 47' Perisic, 67' Icardi (p), 89' Gagliardini
