Su Casteddu, in chirca de sos tres puntos, oramai non binchet in campionadu dae su 15 de freàrgiu. Sa partida de oe cun sa Sampdoria est ocasione pro torrare a sa vitòria. Sos òmines de Marco Giampaolo imbetzes ant bìnchidu sas ùrtimas tres. 9 puntos chi lis ant permìtidu de nche cròmpere a su de deghe positziones in classìfica.
Sos ruju-biaitos cumintzant bene e a su de ses minutos nche colant in vantàgiu. Su gol est de Isla. Su tzentrocampista tzilenu cun unu tiru sestadu bene, e cun su contributu de sa defensa aversària, resurtat a nch'istichire sa botza a intro. Mancari sos sardos apant isblocadu su resurtadu, su ritmu non creschet e sa partida abarrat blocada. Bi proat sa Sampdoria a torrare a aparigiare su caminu, ma sos genovesos non sunt cuncretos. Su parègiu arribat a su de 22 minutos cun Quagliarella. Su passàgiu detzisivu est de Muriel chi fiat pighende dae sa fasca. S'atacante napoletanu, de prima intentzione, antìtzipat a Pisacane e parègiat sos contos.
A su de 52 minutos, in sa segunda fratzione, Sau tenet s'ocasione pro nche marcare sa de duos, ma si faghet ipnotizare dae Viviano. Ambas sas iscuadras paret chi non chèrgiant fortzare su giogu, s'impressione est chi si chèrgiant cuntentare de unu puntu peròmine. A su de 85 minutos sos lìgures si nch'acòstiant a su vantàgiu, ma Torreira leat petzi sa traessa. A su de 89 minutos Ibarbo nche ghetat sa botza a intro a pustis de un'essida pagu profetosa de Viviano. S'àrbitru però annullat su gol pro positzione irregulare de Pisacane. Acabbat 1-1.
Formatziones
Sampdoria: Viviano, Bereszynski, Silvestre, Skriniar, Pavlovis, Praet (55' Linetty), Torreira, Barreto, Fernandes (46' Djuricic), Quagliarella, Muriel (81' Schick).
Allenadore: Marco Giampaolo
Casteddu: Gabriel, Padoin (82' Ibarbo), Pisacane, Bruno Alves, Murru, Ionita, Tachtsidis (66' Di Gennaro), Dessena, Isla, Joao Pedro, Sau (85' Borriello).
Allenadore: Massimo Rastelli
Gol: 6' Isla, 22' Quagliarella
