 |
| Deretos Air liquide. Url imàgine |
Francu sos estratores, nde sunt cumbintos belle totus, in su mundu. A
sa segura nde sunt cumbintos sos trèighi chi nch'ant ammaniadu su
Consìgiu pro s'Idrògenu, (Hydrogen Council), in Davos, Isvìtzera, sas
primas dies de su mese de ghennàrgiu. Semus chistionende de bobbois in
àmbitu automobilìsticu, Toyota, Daimler, Bmw, in àmbitu energèticu, Air
Liquide, Shell e ferru-tranviàriu, Alstom, pro nde mentovare petzi unos
cantos. Sa presidèntzia e sa vitze-presidèntzia pro tempore, a dae chi
s'idea est nàschida cun issos, l'ant a leare, in òrdine, Takeshi
Uchiyamada, giaponesu, amministradore in càrriga de su grupu Toyota e
Benoît Potier, frantzesu, printzipale de Air Liquide.
Ambos ant
dadu a intèndere chi ant a investire 1,9 milliardos de èuros cada annu,
dae su 2018 a su 2022 pro sa chirca e s'isvilupu in contu de idrògenu e
de motores cumpatìbiles. Ant fintzas annantu chi diant crèschere su
gastu si sos guvernos ant a mantènnere in mèritu una legislatzione
istàbile e chi duret a tempus longu. Bonas noas chi, si est beru chi non
nch'istèsiant su pantasma de su capitalismu, nessi leant in cunsideru
s'ambiente e mescamente sa salude. Ca, si sighimus gosi, su destinu nos
lu semus marchende cun sas manos nostras etotu.
A rodeu, peri
sos caminos de totu su mundu, sunt pagu prus o mancu 1milliardu, sos
veìculos lèbios a motore. Est a nàrrere furgones, veturas,
mototzicletas. Sena carculare duncas sos mezos pesantes chi sunt tres
bortas de mancu. E 16mìgia de milliardos - unu nùmeru chi non benit
bene mancu a l'iscrìere - sos chilòmetros, su tretu chi s'ant carcadu
cada die, fintzas a oe.
A li fàghere su contu in tèrmines de
traballu operaju o de incuinamentu nos diat segare s'alenu, e forsis
non diamus èssere a tretu de règhere.
Unu venidore a idrògenu est duncas possìbile, auspicàbile, inevitàbile.
