Postìtzipu difìtzile meda su de oe in su Santu Elia pro su Casteddu chi disafiat sa Juventus de s'ex Allegri. Fintzas unu puntu diat èssere de oro pro punnare in antìtzipu a sa sarvesa.
Rastelli in dae in antis faghet afidamentu subra Borriello e Sau. A s'àtera ala imbetzes Higuain est sustènnidu dae Dybala, dae Mandzukic e dae Cuadrado.
Movent bene sos sardos chi si nche ghetant a dae in antis giai dae su primu minutu. Sos primos trinta minutos ammustrant duas iscuadras in echilibru, cun su Casteddu chi paret chi tèngiat carchi cosa in prus. A su de 37 minutos però Higuain indiritzat sa partida conca a Piemonte. Su passàgiu pretzisu est de Marchisio. S'atacante argentinu retzit sa botza movende dae positzione regulare e nche la còllocat in palas de Rafael cun pretzisione chirùrgica.
In su segundu tempus sos biancu-nieddos signant sa de duos. Est torra Higuain a nche pònnere sa botza in gol. Sa Juventus cuncretizat un'atzione manovrada chi cumintzat cun Cuadrado, nche colat in sos pees de Dybala e si nche serrat cun su destru de s'ex giogadore de su Napoli. Est su 0-2. Su Casteddu chircat de creare giogu, ma sa defensa juventina li serrat totu sas ghennas. Sos tentativos de Sau e de Isla nche sunt a tesu meda dae sa possibilidade de ismesare s'isvantàgiu. Pro non si fàghere mancare nudda sos sardos abarrant fintzas in deghe. Barella retzit sa segunda targhita groga pro unu fallu a Pjanic chi fiat intradu pagora. Pro su Casteddu est sa de 8 targhitas rujas in custa istajone. A su de 72 minutos Pisacane bi proat dae sos 25 metros, ma Buffon s'illònghiat e sarvat sa porta. A su de 77, imbetzes, Bruno Alves, cun unu tiru lìberu andat a curtzu a su gol, ma sa botza nch'essit. In sos ùrtimos minutos sa Juventus faghet possessu e sena permìtere peruna rèplica a sos òmines de Rastelli. In su recùperu Mandzukic tenet sa botza de su 0-3, ma sa traessa lafirmat. Acabbat 0-2.
Formatziones
Casteddu: Rafael, Pisacane (82' Padoin), Bruno Alves, Capuano Isla, Di Gennaro, Dessena (62' Ionita), Barella, Murru, Sau, Borriello (75' Ibarbo).
Allenadore: Massimo Rastelli
Juventus: Buffon,Lichtsteiner, Bonucci, Chiellini (18' Rugani), Alex Sandro, Khedira, Marchisio (67' Pjanic), Cuadrado, Dybala (92' Lemina), Mandzukic, Higuain.
Allenadore: Massimiliano Allegri
Gol: 37' Higuain, 47' Higuain
Espulsos: 67' Barella
