Casteddu a cassa de puntos oe in Bèrgamu. S'iscuadra de Rastelli, cun pagos òmines a disponimentu, cheret torrare a domo a su nessi cun unu parègiu, ma su disafiu de oe no est pro nudda fàtzile. S'Atalanta non cheret pèrdere cuntatu cun sa zona europea.
Sos giogadores nieddu-asulos movent deretu punta a dae in antis e a su de bator minutos nche colant in vantàgiu. Su passàgiu traessu bàsciu de Conti est giustu pro sos pees de Gomez chi est a sa sola in su segundu palu. Su Casteddu est pagu pretzisu e sos bergamascos si nd'aprofitant de sas faddinas a tzentrocampu. A su de 17 minutos arribat su raddòpiu de sos lombardos, semper cun Gomez. Su giogadore, dae su cugione de manca de s'àrea manna òperat unu tiru indiritzadu a su segundu palu chi, nche bàrigat su portieri e si nch'insertat in sa ruga de sos palos. Su Casteddu proat a fraigare agigu de giogu, ma cara a Berisha non b'at pretzisione.
In sa segunda fratzione de sa partida sighit in su matessi surcu de sa prima. Sos sardos chircant de si fàghere logu isfrutende sos tiros lìberos e sos passàgios longos, ma Borriello, oe atacante ùnicu, paret isoladu. Sa partida s'isvilupat mescamente in mesu a su campu, cun pagas atziones de atacu. In prus, cun su tempus, su ritmu mènguat e fintzas s'ispetàculu chi, a nàrrere sa veridade, no est decolladu mai. Petzi a su de 86 e a su de 93 minutos s'Atalanta tenet sa possibilidade de nche marcare su de tres, ma Rafael respinghet. Acabbat 2-0 una de sas partidas prus lègias de su campionadu..
Formatziones
Atalanta: Berisha, Toloi, Caldara, Masiello (62' Zukanovic), Conti, Franck Kessié (81' Cristante), Freuler, Spinazzola, Kurtic, Petagna, Gomez (90' Mounier).
Allenadore: Gian Piero Gasperini
Casteddu: Rafael, Pisacane, Ceppitelli (83' Ionita), Bruno Alves, Capuano (79' Serra), Di Gennaro, Tachtsidis, Isla, Dessena (70' Miangue), Barella, Borriello.
Allenadore: Massimo Rastelli
Gol: 4' Gomez, 17' Gomez
