Sos òmines de Rastelli paret chi apant àpidu s'echilìbriu giustu. A lu cunfirmare b'est sa vitòria contra a su Genoa de sa chida colada e sa partida pèrdida a sos ùrtimos minutos contra a su Milan. Oe però, cun sa Roma, no est fàtzile.
Ambas sas iscuadras movent ispibillas. A su de 6 minutos sa Roma si nch'acòstiat tropu a s'àrea casteddaja, ma Rafael intervenet e respinghet sa botza. A bellu a bellu sos grogu-rujos nd'essint a pìgiu e gestint su giogu in chirca de su vantàgiu. Sos sardos si proponent pagu e punnant mescamente a sos contratacos cun passàgios longos. A su de 31 minutos sa Roma diat pòdere aprofitare de un'ocasione manna, ma Dzeko si nche papat una rete prus manna de a issu etotu. Su giogadore bosnìacu fiat a sa sola in s'àrea. De Rossi, cun unu bellu passàgiu traessu, at postu a s'atacante in cunditzione de nche marcare s'1-0, ma su tiru dèbile nch'est fertu deretu a sos bratzos de Rafael.
In su segundu tempus sos òmines de Spalletti colant in vantàgiu. Dzeko custa borta non faddit. Si nche lìberat dae sa marcadura e intertzetat su passàgiu traessu de Rudiger istichende·nche·lu a intro.
Sos romanistas lu chircant meda a Dzeko. Sos passàgios longos sunt totus pro issu. A su de 70 minutos est perigulosu Perotti chi nch'arribat finas a sos tretos de Rafael chi però est bravu a respìnghere su tiru. Roma a curtzu a su raddòpiu fintzas a su de 76 minutos. Su portieri ruju-biaitu narat chi nono a unu corfu cun sa conca de su sòlitu Dzeko e in sa respinta Peres si faddit su tapin. Dzeko est protagonista fintzas a su de 84. Su corfu cun sa conca faghet trèmere sa traessa e torrat in segus. Non bi càpitat prus nudda finas a s'acabbu, francu s'espulsione de Joao Pedro pro unu fallu grae a Strootman.
Formatziones
Roma: Szczesny, Rudiger, Fazio, Manolas (91' Vermaelen), Emerson, Strootman, De Rossi, Peres, Perotti (81' El Shaarawi) Nainggolan (88' Paredes), Dzeko.
Allenadore: Luciano Spalletti
Casteddu: Rafael, Murru, Bruno Alves, Ceppitelli, Pisacane (82' Farago), Dessena (66' Joao Pedro), Tachtsidis, Isla, Farias (72' Sau), Barella, Borriello.
Allenadore: Massimo Rastelli
Gol: 55' Dzeko
Espulsos: 94' Joao Pedro
