 |
| Deretos regione.sardegna.it |
Regionales:
su bandu pro unu presidente e unu Consìgiu noos, lu diant dèvere
ghetare su 2019. Nemos podet garantire chi sa legisladura atuale
nch'aguantet. B'at prus de una boghe in contu de dimissiones e de votu
primidiu. E si Pìgliaru si diat dimìtere pro cale si siat resone
(auguremus·li cada bene), a domo finamentas sos consigeris. “Aut simul
stabunt, aut simul cadent”, narat su ditzu. E si esseret, ite b'at a
rodeu?
A manu dereta Cappellacci, prus chi no ativu
in rete e peri sas biddas. Ammentat a Pili e sa martza sua de su 2004.
Nât chi non s'at a candidare, ma in polìtica totu est possìbile. E,
nessi finas a como, non b'at nemos chi l’aumbret.
A
manu manca amus bidu chi su cras annuntziadu dae Pìgliaru no est
comintzadu mai. Su Consìgiu de istadu at negadu luego sos iscrannos a
Irs e a Idv. A foras finamentas Arbau (La Base, ma cun Ledda galu
ghiende su grupu mistu). Essidos imbetzes dae sa majoria Rifondazione,
RossoMori e comunistas italianos (petzi sos de Muledda teniant
s'assessoradu).
Lecis, giornalista e intelletuale
de màdrighe togliatiana, faeddat de una coalitzione oramai ghiada de s'asse
Cabras-Maninchedda, ma s'in casu arribarent sos tempos de unu sèberu,
non diat èssere cosa fàtzile pro su Pd. Su sotzialista de sa Fondazione
di Sardegna? Su filòlogu macumeresu?
E Sel? In su
mese de freàrgiu de su 2015, Maninchedda iscrieit chi «b'at chie la timet che a su fogu sa nàschida de unu partidu de sa soberania, de sa
giustìtzia sotziale, de su traballu, de sa libertade e de s'isvilupu».
Dae pagu s'assessore macumeresu at faeddadu de su «coràgiu de unu pensu polìticu sotzialista pro sa Sardigna».
Duncas, Sel
Sardegna (chi no est Sinistra italiana) cun Maninchedda conca a
eventuales primàrias de coalitzione? Luca Pizzuto punnat a un'assòtziu de manca pro sa Sardigna «chi si potzat finamentas abèrrere a sas
esperièntzias de su sovranismu e de su catolitzèsimu sotziale».
In
su versante autodeterminista amus àpidu sa derrota de Kelledda Mùrgia. E
issa – l’at naradu – non s’at a candidare. Anthony Muroni (chi non diat
chèrrere a votare luego) paret s'òmine chi nche nde potzat collire sos
inditos. «Non giuat a àere ghias – at iscritu sàbadu –, nen candidados a
sa presidèntzia chi pensent de ischire totu». A bìdere istemus. Ma su
perìmetru polìticu? «Tocat de chistionare cun belle totus. Su belle? Deo
lu riservo a chie at àpidu responsabilidades de guvernu in sos ùrtimos
oto annos». Ghennas abertas a carchi partidu italianu?
S'incògnita sighit a èssere sa lege eletorale (e a votare luego cheret
nàrrere a no la mudare). Sende gasi, a una lista li bastat su 5%. Ma pro
sas coalitziones bi cheret su 10%.
E posca bi sunt sos 5 isteddos, malos a cumprèndere in contu de nùmenes e de prospetivas de cunsensu.
