S'agentzia americana pro s'amparu de s'ambiente at notificadu unas cantas violatziones de sas normas pro su chi pertocat sas emissiones in sos motores diesel de sa Fiat-Chrysler Automobiles. In su mirinu b'at 104mìgia veìculos produtos in sos Iua.
S'azienda ghiada dae Sergio Marchionne, imputada de àere installadu un'aplicativu chi permitit emissiones superiores a sos lìmites, diat pòdere èssere multada. S'inchesta pertocat sas produtziones de su 2014, de su 2015 e de su 2016 de sos modellos Grand Cherokee e Dodge Ram Truck.
S'amministradore delegadu de s'azienda ìtalo-americana però si defensat narende chi «non b'at nudda a cumone cun su casu Volkswagen, inoghe semus faeddende de un'àtera chistione» e agiunghet chi «amus semper tentu raportos cun s'Epa dae prus de un'annu e b'at de nàrrere chi nemos podet èssere gasi macu a su puntu de chircare de nch'installare unu software illegale».
Su grupu automobilìsticu però arriscat de dèvere pagare una multa de 4,63 milliardos de dòllaros, est a nàrrere 44.439 dollaros pro cada veìculu. «S'azienda at a andare a dae in antis fintzas si amus a dèvere pagare totu cussu dinare» at naradu Marchionne.
In s'ìnteri su tìtulu, in sa giorronada de eris, at pèrdidu su 16 puntos in sa bursa de Milanu e 14 in sa de Wall Street. Oe paret torrende in surcu.
